Rreth një në çdo 100 njerëz në Gaza është vrarë që nga shpërthimi i luftës midis Izraelit dhe Hamasit më 7 tetor, tregojnë statistikat palestineze.
Të paktën 22 mijë e 835 njerëz janë vrarë, njoftoi Ministria palestineze e Shëndetësisë në Ramallah në përditësimin e saj të përditshëm të hënën.
Kjo është 1% e popullsisë totale të Gazës prej 2.27 milionë banorësh, sipas Byrosë Qendrore Palestineze të Statistikave.
Ministria gjeneron të dhënat e saj nga spitalet në Rripin e Gazës të kontrolluar nga Hamasi, raporton CNN.
Ajo tha se 58 mijë 416 njerëz janë plagosur. Kjo është më shumë se 2.6% e popullsisë, ose më shumë se një në 40 njerëz.
Ministria e Shëndetësisë në Gaza e kontrolluar nga Hamasi, e cila tenton të ketë shifra pak më të larta se ministria në Ramallah për shkak të vonesave në transmetimin e informacionit në Bregun Perëndimor, vlerësoi numrin total në 23 mijë e 84 të vdekur të hënën. Ajo tha se 58 mijë e 926 njerëz janë plagosur.
Izraeli ka thënë se më shumë se 8 mijë nga të vdekurit janë pjesëmarrës të Hamasit.
Ministria e Shëndetësisë në Ramallah thotë se më shumë se 5 mijë e 300 nga të vdekurit janë gra dhe më shumë se 9 mijë prej tyre janë fëmijë. Së bashku kjo do të përbënte gati dy të tretat e të vdekurve.
