LIVE: Arrihet një marrëveshje mes Izraelit dhe Hamasit, ndërmjetësuan këto dy shtete

Katari dhe Franca kanë ndërmjetësuar një marrëveshje mes Izraelit dhe Hamasit për të ofruar ilaçe urgjente për rreth 45 pengje izraelite, që po mbahen nga militantët palestinezë në Rripin e Gazës në këmbim të ndihmës humanitare dhe mjekësore për civilët palestinezë.

Të dy vendet thanë se ndihma do të nisej nga Katari për në Egjipt të mërkurën përpara se të kalojë në Rripin e Gazës përmes pikës kufitare në Rafah.

Zëdhënësi i Ministrisë së Jashtme të Katarit, Majed al-Ansari tha në një deklaratë se marrëveshja do të nënkuptojë se "ilaçet së bashku me ndihmat e tjera humanitare do t'u dërgohen civilëve në Rripin e Gazës, në zonat më të prekura dhe më të pambrojtura, në këmbim të dërgimit të ilaçeve të nevojshme për pengjet izraelite në Gazë”.

Ai nuk dha detaje mbi sasinë dhe llojin e ndihmës që do t'u dërgohej civilëve.

Zyra e kryeministrit izraelit Benjamin Netanyahu tha se dy avionë të Forcave Ajrore të Katarit do të uleshin të mërkurën në Egjipt me ilaçe të blera në Francë bazuar në një listë izraelite.

Më parë, Philippe Lalliot, kreu i qendrës së krizës në ministrinë e jashtme të Francës, e cila organizon operacionet e ndihmave, tha se negociatat kishin vazhduar për javë të tëra dhe ideja fillestare kishte ardhur nga familjet e disa prej pengjeve izraelite.

Secilit prej 45 pengjeve do t'u dërgohen pako specifike mjekësore për disa muaj, të cilat janë mbledhur në Francë. Komiteti Ndërkombëtar i Kryqit të Kuq do të koordinojë shpërndarjen e ndihmës në terren.

Franca ka ende tre shtetas të saj që po mbahen nga militantët e Hamasit në Rripin e Gazës, por asnjëri prej tyre nuk ka nevojë urgjente për ilaçe, tha zoti Lalliot./VOA

Shtetet e Bashkuara kanë shpresë që bisedimet e ndërmjetësuara nga Katari mund të rezultojnë me një marrëveshje të re në mes të Izraelit dhe Hamasit, për t’i liruar pengjet, në këmbim të armëpushimit në Gazë, ka thënë Shtëpia e Bardhë të martën.

Hamasi, grup palestinez që udhëheq Gazën, është shpallur organizatë terroriste prej Shteteve të Bashkuara dhe Bashkimit Evropian.

“Nuk dua të them shumë publikisht, mirëpo kemi shpresë që mund të kemi fryte, dhe atë shpejt”, ka thënë zëdhënësi i Këshillit për Siguri Kombëtare i SHBA-së, John Kirby.

Brett McGurk, këshilltari kryesor për Lindje të Mesme, i presidentit amerikan Joe Biden, është në Doha qysh javën e kaluar, për të diskutuar një marrëveshje për pengjet.

Militantët e Hamasit kanë marrë 250 njerëz peng në Gazë, kur e kanë kryer sulmin e 7 tetorit në Izrael, duke lënë edhe mbi 1.200 njerëz të vrarë.

Një pjesë e pengjeve është liruar, me një marrëveshje të mëhershme, ndërsa tani besohet se mbahen edhe 132 njerëz, disa prej të cilëve edhe amerikanë.

Pas sulmit të Hamasit, Izraeli e ka nisur luftën, me synim të shkatërrimit të grupit ekstremist.

Si pasojë e luftës, në Gazë janë vrarë rreth 24.200 palestinezë, rreth 70 për qind e tyre gra dhe fëmijë.

Kirby e ka përmendur rëndësinë e njoftimit të Izraelit që do ta pushojë fazën intensive të luftës, e cila ka rritur shqetësimet për përshkallëzim të konfliktit në Lindje të Mesme.

Sipas tij, ulja e shkallës së sulmeve nga Izraeli, do të ndikojë në shtim të ndihmave brenda Gazës.

Një ndërprerje pothuajse totale e internetit në Rripin e Gazës ka kaluar tashmë 96 orë, sipas faqes së monitorimit të internetit Netblocks.

Kjo është ndërprerja më e gjatë e qëndrueshme e internetit e telekomunikacionit e regjistruar në Gaza që nga fillimi i konfliktit, raporton Netblocks, ku shumica e banorëve nuk janë në gjendje të kontaktojnë botën e jashtme që nga 12 janari.

Zyra qeveritare e Hamasit në Gaza tha se ndërprerja e komunikimit e bën më të vështirë për shërbimet e urgjencës që ende funksionojnë për të arritur tek njerëzit e plagosur në sulmet ajrore, raporton CNN.

Të paktën 80 për qind e sektorit të komunikimit është shkatërruar tashmë dhe ekuipazhet teknike që kryejnë punën e riparimit janë vazhdimisht në shënjestër “megjithë koordinimin paraprak përmes institucioneve ndërkombëtare”, tha të hënën agjencia zyrtare palestineze e lajmeve WAFA.

Të premten, rrjeti celular Ooredoo Palestine tha se linjat e tij kryesore të telekomunikacionit dhe të internetit kishin pësuar dëmtime në sulmet izraelite, duke çuar në mbylljen e plotë të shërbimeve në zonat jugore dhe qendrore të Gazës.

Një tjetër kompani e madhe palestineze e telekomunikacionit, Paltel, gjithashtu njoftoi të premten se të gjitha shërbimet e telekomunikacionit në Rripin e Gazës u ndërprenë për shkak të “agresionit të vazhdueshëm”.

Ka shkuar në 24 mijë e 285 numri i palestinezëve të vrarëve në Gaza, tha Ministria e Shëndetësisë e vendit.

Ajo shtoi të plagosur janë 61 mijë e 154, shkruan The Guardian.

Kjo ministri tha gjithashtu se në 24 orët e fundit u vranë 158 palestinezë, dhe u plagosën 320.

E gjithë kjo erdhi si pasojë e sulmeve të Izraelit në Rripin e Gazës që nisën më 7 tetor.

BE-ja ka sanksionuar liderin e Hamasit, Yahia Sinouar dhe e ka shtuar gjithashtu në listën e terroristëve. Si rezultat, fondet dhe asetet financiare do të ngrihen nga të gjitha vendet anëtare të BE-së, transmeton "Jerusalem Post".

“Këshilli vendosi sot të shtojë një individ në listën terroriste të BE-së.

Ky vendim vjen si pjesë e përgjigjes së BE-së ndaj kërcënimit të paraqitur nga Hamasi dhe sulmeve të tij terroriste brutale dhe pa dallim në Izrael më 7 tetor 2023.

Këto sanksione do të futen në fuqi nga sot”, thuhet në deklaratë.

Agjencia shëndetësore e OKB-së thotë se rritja e rasteve është kryesisht në zonat qendrore dhe në guvernatorin Rafah në jug, "me kushtet aktuale të ujit dhe kanalizimeve që janë të rëndësishme për përhapje të mëtejshme".

Virusi i hepatitit përhapet kryesisht kur një person i painfektuar dhe i pavaksinuar gëlltit ushqim ose ujë të kontaminuar me feçet e një personi të infektuar, raporton Al-Jazeera, transmeton "Bota sot".

Sipas OKB-së, përmbytjet janë raportuar në pjesë të ndryshme të Rripit për shkak të dëmtimeve të mëdha të infrastrukturës, shkatërrimit dhe bllokimit të madh të sistemit të ujërave të zeza dhe ujërave të zeza.

Lagunat e ujërave të shiut janë kontaminuar me ujëra të zeza dhe disa laguna rrezikohen të përmbyten nëse reshjet intensifikohen.

Ministria palestineze e arsimit thotë se 4,368 studentë palestinezë janë vrarë në territoret e pushtuara që nga fillimi i agresionit izraelit më 7 tetor në Rripin e Gazës.

Në një deklaratë, ministria tha se numri i studentëve të vrarë në Gaza gjatë tre muajve e gjysmë të fundit është 4,327, me 7,819 të tjerë të plagosur në sulmet izraelite.

Në Bregun Perëndimor të pushtuar, 41 studentë u vranë dhe 282 të tjerë u plagosën. Të paktën 85 studentë u arrestuan nga Izraeli në të njëjtën periudhë kohore, raporton Al-Jazeera, transmeton "Bota sot".

Në Rripin e Gazës, 231 mësues dhe administratorë u vranë dhe 756 u plagosën.

Sipas ministrisë, të paktën 281 shkolla qeveritare dhe 65 shkolla të lidhura me Agjencinë e Kombeve të Bashkuara për Ndihmën dhe Punët për Refugjatët (UNRWA) u bombarduan nga Izraeli në Rripin e Gazës, duke rezultuar se 83 prej tyre u dëmtuan rëndë dhe shtatë u shkatërruan plotësisht.
​

Një grua u vra dhe të paktën 17 të tjerë u plagosën në një sulm me thikë në Ra’anana, qytet në veri të Tel Avivit, të hënën pasdite, raporton "CNN".

Policia ka arrestuar dy të dyshuar, të cilët janë nga qyteti i Hebronit të Bregut Perëndimor i pushtuar nga Izraeli, e të cilët dyshohen se vodhën të paktën tri makina të ndryshme dhe tentuan të godisnin këmbësorët gjatë sulmit. Policia bëri të ditur se dy të dyshuarit ishin palestinezë dhe kishin hyrë ilegalisht në Izrael.

Shërbimet e Shpëtimit të Izraelit thanë se janë trajtuar mbi dhjetë persona që ishin lënduar nga ky sulm në vende të ndryshme në të gjithë qytetin. Policia po kontrollonte zonën për të përcaktuar nëse të dyshuar të tjerë ishin të përfshirë në sulm.

Që nga fillimi i luftës Izrael-Hamas, ka pasur një numër sulmesh palestineze kundër izraelitëve, veçanërisht në pikat e kontrollit në Bregun Perëndimor, si dhe në Jerusalem. Forcat izraelite kanë kryer një sërë operacionesh në të gjithë Bregun Perëndimor, duke arrestuar më shumë se 2 mijë persona.

Imazhet e publikuara sot nga një fotograf palestinez tregojnë popullatën civile duke vrapuar dëshpërimisht pas ndihmave në ushqime që kanë mbërritur në pjesën veriore të Gazës. Lufta ka shkatërruar pothuajse gjithë infrastrukturën në këtë pjesë të territorit, ndërsa forcat izraelite, pavarësisht trysnisë ndërkombëtare, kanë vazhduar edhe të hënën sulmet ajrore në të gjithë Rripin e Gazës.

Ushtria izraelite tha të hënën se falë operacioneve të tyre, për gjetjen e armative të grupit, ishin vrarë pesë militantë në Gazën veriore. Sipas njoftimit, sulmet ajrore dhe tokësore shkatërruan objektet e magazinimit të armëve në qytetin jugor të Gazës, Khan Younis.

Autoritetet e Hamasit thonë se numri i të vdekurve ishte rritur në mbi 24 mijë dhe më shumë se 60,000 të tjerë janë të plagosur ndonëse kur Hamasi kur jep shifra të viktimave nuk bën dallime mes luftëtarëve dhe civilëve.

Izraeli filloi fushatën e tij ushtarake për të shkatërruar Hamasin pas sulmit terrorist të 7 tetorit kur luftëtarët e tij kaluan në jug të Izraelit, duke vrarë 1200 njerëz dhe duke marrë robër 240 të tjerë.

Të dielën pasdite gjatë një mbledhje të qeverisë mbi buxhetin, Kryeministri izraelit Benjamin Netanyahu përsëriti se lufta do të vazhdojë gjatë. 

“Një nga gjërat që u bë e qartë është se ne do ta vazhdojmë këtë luftë e cila do të zgjasë edhe shumë muaj. Kjo kërkon që ne të shpenzojmë shumë më tepër për sigurinë sesa kemi planifikuar”, thotë zoti Netanyahu.

Ai është zotuar disa herë se lufta nuk do të ndalet pavarësisht trysnisë në rritje ndërkombëtare që të ndërpresë ofensivën ushtarake për shkak të numrit të madh të viktimave dhe shkatërrimit masiv të infrastrukturës civile në Gazë.

Imazhet e publikuara sot, të regjistruara nga telefoni celular i një fotografi palestinez, tregojnë popullatën civile në pjesën veriore të Gazës, duke vrapuar pas makinave të OKB-së në kërkim të miellit dhe ushqimeve. Sipas fotografit Nooh Al Shaghnobi ndihmat humanitare në pjesë që gjendet në kufi me Izraelin, janë shumë të rralla dhe sa herë del informacioni se kanë ardhur ushqime, njerëzit vrapojnë me dëshpërim për të siguruar, të paktën një thes me miell.

“Pika e kontrollit e izraelitëve është afër dhe shikoni me mijëra njerëz se si vrapojnë për të marrë miell”, dëgjohet duke thënë në video fotografi palestinez, Nooh Al-Shaghnobi.

Të dielën u shënuan njëqind ditë që pas fillimi i luftës Izrael-Hamas që kanë rritur shqetësimet për një zgjerim të konfliktit..VOA

Garda Revolucionare e Irakut njoftoi se ka goditur “qendra spiunazhi” të Izraelit në rajonin gjysmëautonom Kurdistan në Irak dhe ndaj forcave të Shtetit Islamik në Siri, njoftoi të hënën media shtetërore.

“Raketa balistike u përdorën sot vonë për të shkatërruar qendra spiunazhi dhe grumbullimi të grupeve terroriste anti-iraniane në rajon”, thuhet në një deklaratë të gardës iraniane, duke përmendur agjencinë izraelite të zbulimit, Mossad.

Krahas sulmeve në verilindje të Erbilit, kryeqytetit të Kurdistanit, pranë një zone të banuar në afërsi të konsullatës amerikane, garda iraniane tha se bëri sulme edhe ndaj “autorëve të operacioneve terroriste” në Iran, përfshirë Shtetin Islamik.

Dy zyrtarë amerikanë i thanë agjencisë së lajmeve Reuters se nga sulmet nuk u dëmtuan objekte të Shteteve të Bashkuara.

Sulmet vijnë mes shqetësimeve për përshkallëzim të konfliktit në Lindjen e Mesme, që me fillimin në 7 tetor të luftës mes Izraelit dhe grupit militant Hamas dhe ndërsa aleatët e Iranët janë përfshirë nga drejtime të ndryshme, si Libani, Siria, Iraku dhe Jemeni.

Irani, i cili mbështet Hamasin në luftën ndaj Izraelit, akuzon Shtetet e Bashkuara se mbështet ato që i quan krime të Izraelit në Gazë. Shtetet e Bashkuara kanë thënë se mbështesin Izraelin për fushatën që po zhvillon, por kanë ngritur shqetësime për numrin e civilëve palestinezë të vrarë.

Të paktën katër civilë u vranë dhe gjashtë u plagosën nga sulmet në Erbil, njoftoi këshilli qeverisës i Kurdistanit, duke e përshkruar sulmin si “një krim”.

Sipas burimeve nga shërbimet irakiane të sigurisë dhe të mjekësisë, ndër të vrarët nga të paktën një raketë që goditi shtëpinë e tyre, ishte edhe multimilioneri kurd dhe sipërmarrësi Peshraw Dizayee dhe disa anëtarë të familjes së tij.

Një tjetër raketë goditi shtëpinë e një drejtuesi të shërbimit kurd të zbulimit dhe një tjetër në një nga godinat e këtij shërbimi.

Agjencia e lajmeve Reuters nuk arriti të verifikojë në mënyrë të pavarur këto njoftime. Zyrtarët e qeverisë izraelite nuk kanë komentuar./VOA