Pakistani dënoi fuqishëm të martën një sulm ajror iranian brenda kufijve të tij që vrau dy fëmijë, duke e quajtur atë një “shkelje të paprovokuar të hapësirës së tij ajrore” dhe duke paralajmëruar për hakmarrje.
Irani tha se përdori “sulme me raketa precize dhe me dronë”, për të shkatërruar dy bastione të grupit militant sunit Jaish al-Adl, i njohur në Iran si Jaish al-Dhulm, në zonën Koh-e-Sabz të provincës jugperëndimore të Balochistanit të Pakistanit, shkruan CNN.
Sulmi vjen pasi Irani lëshoi raketa në Irakun verior dhe Siri të hënën, në përshkallëzimin e fundit të armiqësive në Lindjen e Mesme, ku lufta e vazhdueshme e Izraelit në Gaza rrezikon të shndërrohet në një konflikt më të gjerë rajonal.
Ministria e Jashtme e Pakistanit tha se sulmi në territorin e saj vrau “dy fëmijë të pafajshëm” dhe paralajmëroi Iranin për “pasoja të rënda”.
Ajo e përshkroi sulmin ajror si një “shkelje të paprovokuar të hapësirës së saj ajrore nga Irani … brenda territorit pakistanez”.
“Është edhe më shqetësuese që ky akt i paligjshëm ka ndodhur pavarësisht ekzistencës së disa kanaleve të komunikimit midis Pakistanit dhe Iranit”, tha ministria.
