LIVE: Zhvillimet e fundit në Gaza, shenja të “ringjalljes” së Hamasit – BE frikësohet nga kjo gjë!

Hamasi ka filluar të rishfaqet në zonat nga ku Izraeli tërhoqi forcat një muaj më parë. Grupi militant ka filluar të rishfaqë ditët e fundit punonjësit e policisë dhe të bëjë pagesa mujore për disa nga punonjësit civilë në qytetin e Gazës.

Shenjat e rigjallërimit të Hamasit në qytetin më të madh të Gazës nxjerrin në pah aftësinë mbijetuese të këtij grupi, megjithë fushatën ajrore dhe tokësore të Izraelit në katër muajt që kur sulmi i 7 tetorit në Izrael shkaktoi luftën. Izraeli thotë se është i vendosur të shkatërrojë Hamasin dhe t’ia ndalojë rikthimin në pushtet në Gazë, ku ka sunduar që nga viti 2007.

Gjatë ditëve të fundit, Izraeli rifilloi sulmet ajrore në pjesët perëndimore dhe veriperëndimore të qytetit të Gazës, përfshirë në disa nga zonat ku u njoftua se po bëhej shpërndarja e pagave.

Katër banorë të qytetit të Gazës i thanë agjencisë së lajmeve Associated Press se në ditët e fundit, oficerë policie me dhe pa uniformë ishin dislokuar pranë stacioneve të policisë dhe zyrave të tjera të qeverisë, përfshirë pranë spitalit Shifa, më të madhit në vend. Banorët thanë se panë rikthimin e punonjësve civilë dhe të sulmeve ajrore izraelite pranë zyrave të përkohshme.

Rikthimi i policëve shënon një përpjekje për të risjellë rendin në qytetin e shkatërruar pasi Izraeli tërhoqi një numër të madh forcash nga Gaza veriore muajin e kaluar, i tha në kushte anonimiteti një zyrtar i Hamasit agjencisë së lajmeve Associated Press.

Zyrtari tha se drejtuesit e grupit u patën dhënë udhëzime të rivendosin praninë në pjesë të veriut nga ku ishin tërhequr forcat izraelite, ndër të tjera duke ndihmuar për të parandaluar grabitjen e dyqaneve dhe shtëpive të braktisura nga banorët që u larguan drejt jugut sipas urdhërave izraelite për t’u evakuuar.

Gjatë ofensivës tokësore të Izraelit, shumë shtëpi dhe godina mbetën gjysëm të shkatërruara ose u rrënuan plotësisht.

Saeed Abdel-Bar, banor në qytetin e Gazës, tha se një i afërm i tij mori fonde nga një zyrë e përkohshme e Hamasit, që ishte ngritur për të shpërndarë pagesa prej 200 dollarësh për punonjësit e qeverisë, përfshirë oficerët e policisë dhe punonjësit e bashkisë.

Që kur mori kontrollin e Gazës 17 vite më parë, Hamasi ka drejtuar një administratë me dhjetëra mijëra punonjës civilë, përfshirë mësues dhe policë që veprojnë veçmas krahut ushtarak të këtij grupi.

Pagesat e pjesshme për disa nga punonjësit e qeverisë sinjalizojnë se Izraeli nuk i ka dhënë goditje shkatërrimtare Hamasit, megjithëse pretendon të ketë vrarë mbi 9 mijë luftëtarë të këtij grupi.

Ahmed Abu Hadrous, banor në qytetin e Gazës, tha se avionët izraelitë goditën zyrat e përkohshme në disa vendndodhje këtë javë, përfshirë edhe të shtunën.

Udhëheqësit ushtarakë izraelitë patën thënë se kishin prishur zinxhirin komandues të batalioneve të Hamasit në veri, por se individë të caktuar vazhdonin të bënin sulme guerile.

Ndërkohë, luftimet në Gazën jugore kanë vazhduar./VOA

Një protestë u zhvillua në Londër të shtunën duke bërë thirrje për një armëpushim në Gaza. Sipas Fushatës së Solidaritetit të Palestinës, e cila organizoi marshimin, kishin dalë mijëra njerëz.

Fotografitë dhe videot e postuara në rrjetin social X tregojnë turma të mëdha me pankarta, pankarta dhe flamuj palestinezë.

Kjo është demonstrata e parë kombëtare e Mbretërisë së Bashkuar që kur gjykata ndërkombëtare e drejtësisë e OKB-së urdhëroi Izraelin të sigurojë që forcat e tij të mos kryejnë akte gjenocidi në Gaza.

London now. Massive demonstration calling for a #ceasefire. Marching alongside thousands in solidarity with #Gaza and all of #Palestine. pic.twitter.com/8bXtXlfi3y

— Husam Zomlot (@hzomlot) February 3, 2024

Pasi u tha organizatorëve të mërkurën se policia Metropolitane nuk do të lejonte që 300,000 demonstruesit të përfundonin me një tubim në Whitehall , ku marshimet kanë përfunduar rregullisht, forca bëri një kthesë të enjten dhe tha se marshimi mund të përfundonte pranë Downing Street.

Bashkimi Evropian ka shprehur shqetësimin rreth njoftimeve se ushtria izraelite po synon të vijojë betejën kundër militantëve të Hamasit në qytetin Rafah, që ndodhet në kufirin mes Rripit të Gazës me Egjiptin. Mbi 1 milion palestinezë janë zhvendosur në këtë qytet për t’u shpëtuar luftimeve. Shefi i politikës së jashtme të BE-së, Josep Borrell tha të shtunën se konflikti ka të ngjarë të përhapet në të gjithë rajonin nëse nuk arrihet një armëpushim.

Në qytetin Rafah, që ndodhen në kufirin mes Gazës dhe Egjiptit, janë zhvendosur mbi 1 milion vetë, në një përpjekje për t’i shpëtuar luftimeve mes ushtrisë izraelite dhe militantëve të Hamasit.

Udhëheqësit e Bashkimit Evropian shprehën shqetësimin mbi mundësinë e përhapjes së konfliktit mes një situate të tensionuar në rajon edhe nga sulmet e fundit ajrore amerikane ndaj dhjetëra objektivave në Irak dhe Siri, si kundërpërgjigje ndaj vrasjes së tre ushtarëve amerikanë.

“Izraeli po vijon aktivitetin e tij ushtarak në jug, duke i shtyrë njerëzit drejt kufirit egjiptian. Ka 1 milion njerëz që janë zhvendosur në mënyrë progresive drejt kufirit egjiptian. Ata thanë se kjo do ishte një zonë e sigurt. Por në fakt, çfarë po shohim është se bombardimet po prekin popullatën civile dhe kjo po krijon një situatë shumë të rëndë”, tha Josep Borrell, Shefi i politikës së jashtme të BE-së.

Deklaratat e shefit të politikës së jashtme të BE-së pasuan paralajmërimin që bëri të enjten ministri izraelit i Mbrojtjes, Yoav Gallant. Ai tha se pasi trupat izraelite të “pastrojnë qytetin jugor të Khan Younis, nga ku janë larguar dhjetëra mijëra njerëz, ata do të shkojnë në Rafah”. Por zoti Gallant nuk dha një afat kohor se kur do të nisë operacioni atje.

Një ofensivë e tillë mund t’i shtyjë refugjatët drejt Egjiptit, duke minuar marrëveshjen e paqes të Izraelit me këtë vend dhe duke zemëruar akoma më shumë Uashingtonin. Kjo ofensivë gjithashtu mund të dëmtojë bisedimet e ngadalta për paqe me Hamasin dhe të ndërlikojë përpjekjet për lirimin e shumë izraelitëve të marrë peng nga grupi militant, pas sulmit terrorist më 7 tetor.

Perspektiva e një lufte tokësore në Rafah ka rritur frikën për të ardhmen e popullsisë civile që është zhvendosur aty.

Ministrja e Jashtme belge, Hadja Lahbib, vendi i së cilës aktualisht mban presidencën e rradhës të BE-së, paralajmëroi për “një rrezik real të përhapjes së konfliktit”.

"Ne po bëjmë thirrje për përmbajtje. Dhuna nuk është kurrë një përgjigje. Dëgjuam këtë mëngjes dhe dje në mbrëmje, për kundërpërgjigje, me sulme ajrore nga Shtetet e Bashkuara ndaj objektive iraniane në Irak dhe Siri. Kjo përbën një shqetësim të madh. Ne po kërkojmë përmbajtje, dialog dhe zgjedhje diplomatike është e vetmja mënyrë se si ne mund të qetësojmë situatën në Lindjen e Mesme", deklaroi ajo.

Duke iu referuar sulmeve të fundit amerikane në rajon, Ministri i Jashtëm i Polonisë, një aleat i vendosur Uashingtonit, tha se përgjigjia amerikane ishte mëse e justifikuar.

“Ajo që mund t’ju them është se grupet që mbështeten nga Irani kanë luajtur me zjarrin për muaj dhe vite të tëra dhe tashmë ky zjarr po djeg vetë ata”, deklaroi zoti Radek Sikorski./VOA

Forcat e Mbrojtjes së Izraelit (IDF) thonë se kanë vrarë dhjetëra luftëtarë të Hamasit gjatë ditës së kaluar, me sulmet e saj të përqendruara në perëndim të Khan Younis në jug të Rripit të Gazës.

“Trupat kryen bastisje në shënjestër në një numër objektivash të ndryshme terroriste dhe kompleksesh ushtarake, në të cilat ndodheshin pushkë AK-47, granata, pajisje shpërthyese, pajisje ushtarake dhe municione”, tha IDF.

Ministri izraelit i Mbrojtjes, Yoav Gallant dje vizitoi Khan Younis dhe tha se operacioni “po përparon dhe po jep rezultate mbresëlënëse”, shkruan CNN.

“Ne po i arrijmë misionet tona në Khan Younis dhe gjithashtu do të arrijmë në Rafah dhe do të eliminojmë elementët terroristë që na kërcënojnë”, ka thënë Gallant.

Shoqata Palestineze e Gjysmëhënës së Kuqe (PRCS) ka thënë se një nga punonjësit e saj është vrarë.

Organizata thotë se forcat izraelite kanë qëlluar drejt selisë së saj në qytetin jugor të Gazës, Khan Younis, ku thuhet edhe se “një numër” individësh të zhvendosur gjithashtu janë vrarë dhe disa të tjerë janë plagosur, shkruan Sky News.

Khan Younis ka qenë skena e betejave intensive midis ushtrisë izraelite dhe Hamasit në javët e fundit.

Më herët, ministri i mbrojtjes i Izraelit, Yoav Gallant tha se trupat izraelite “po i arrijnë misionet në Khan Younis” në luftën e tyre kundër Hamasit.

Sipas Kombeve tw Bashkuara, “përshkallëzimi i armiqësive” në qytetin jugor të Gazës, Khan Younis, po çon mijëra civilë në Rafah.

“Në ditët e fundit, mijëra palestinezë kanë vazhduar të ikin në jug, i cili tashmë po pret mbi gjysmën e popullsisë së Gazës prej rreth 2.3 milion njerëz. Shumica jetojnë në struktura të improvizuara, tenda ose jashtë. Rafah është një tenxhere me presion. dëshpërimi dhe ne kemi frikë për atë që vjen më pas”, thuhet në njoftimin e OKB-së.

Derisa civilët ikin në Rafah duke kërkuar siguri, Ministri izraelit i Mbrojtjes, Yoav Gallant ka thënë se ushtria izraelite do të synojë zonën pasi të arrijë misionin e saj në Khan Younis.