Një zëdhënës në zyrën e kryeministrit izraelit, Benjamin Netanyahu të enjten ka hedhur poshtë çdo diskutim, për momentin, për një shtet palestinez.
“Tani nuk është koha për të folur për dhuratat për popullin palestinez”, tha për CNN Avi Hyman, zëdhënës i Drejtorisë Kombëtare të Diplomacisë Publike në Zyrën e Kryeministrit izraelit, gjatë një konference për shtyp.
CNN kishte pyetur Hyman në lidhje me raportimin nga The Washington Post se administrata e Biden dhe “një grup i vogël partnerësh në Lindjen e Mesme” po punojnë për të formuluar një plan gjithëpërfshirës paqeje, i cili “mund të shpallet që në javët e ardhshme”.
“Këtu është Izraeli, ne jemi ende në pasojat e masakrës së 7 tetorit”, tha Hyman.
“Tani është koha për fitore – fitore totale kundër Hamasit. Dhe ne do të vazhdojmë rrugën drejt fitores”.
Ndërkaq, presidenti i Shteteve të Bashkuara të Amerikës, Joe Biden e ka bërë të qartë se ai shpreson se një marrëveshje armëpushimi, e cila do të parashikonte lirimin e pengjeve izraelitë dhe të burgosurve palestinezë, mund të çojë në një paqe më të qëndrueshme “në bazë të zgjidhjes me dy shtete”.
