LIVE: Hezbollahu me sulme hakmarrëse ndaj Izraelit

Një sulm ajror izraelit vrau një grua dhe një vajzë në jug të Libanit më 21 shkurt, duke nxitur grupin libanez, Hezbollah që të kundërpërgjigjet me sulme me raketa.

Hezbollahu, që mbështetet nga Irani, pothuajse në baza ditore ka këmbyer zjarr me Izraelin përgjatë kufirit që kur ka nisur lufta mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – më 7 tetor.

Media shtetërore libaneze tha se një grua u vra dhe vajza e saj u plagos rëndë gjatë një sulmi “të armikut” në fshatin Majdal Zun. Më pas, zyrtarët shëndetësorë konfirmuan se edhe vajza është vrarë.

Ekipet e shpëtimit thanë se edhe disa persona të plagosur u dërguan në spital.

Në mbrëmje, Hezbollahu tha se ka gjuajtur disa raketa në fshatin Matzuva përtej kufirit në Izrael “në përgjigje të sulmeve izraelite ndaj fshatrave dhe shtëpive të civilëve”, përfshirë Majdal Zun.

Hezbollahu po ashtu mori përgjegjësinë për 11 operacione të tjera kundër pozicioneve të ushtrisë izraelite në kufi.

Shkëmbimi i zjarrit në kufirit që nga tetori ka lënë të vrarë të paktën 271 njerëz në anën libaneze, shumica luftëtarë të Hezbollahut, por po ashtu 42 civilë, sipas të dhënave të mbledhura nga agjencia AFP.

Në anën izraelite, 10 ushtarë dhe gjashtë civilë janë vrarë, sipas ushtrisë izraelite.

Javën e kaluar, shefi i Hezbollahut, Hassan Nasrallah, u zotua se Izraeli “do të paguajë me gjak”, pasi 10 civilë, përfshirë shtatë anëtarë të një familjeje, u vranë në Liban. Ky ishte sulmi më vdekjeprurës brenda një dite deri më tani. Në atë sulm u vranë edhe pesë luftëtarë të Hezbollahut./REL

Së paku 67 palestinezë janë vrarë nga sulmet izraelite nëpër Rripin e Gazës gjatë natës dhe mëngjesit të së mërkurës, përfshirë në zonat ku civilëve u është kërkuar të strehohen.

Spitali Al-Aqsa në Deir al-Balah thotë se i ka pranuar 44 trupa pas sulmeve të shumëfishta në Gazën qendrore. Associated Press raporton se ka parë ambulanca dhe automjete private duke sjell trupa në këtë spital.

Grupi Mjekët pa Kufij tha të mërkurën se dy njerëz u vranë kur një strehimore ku po qëndronte stafi në Rripin e Gazës u godit nga një sulm gjatë një operacioni izraelit në një zonë ku palestinezëve u ishte thënë se duhet të kërkojnë strehim.

“Derisa informatat janë duke ardhur ende, ambulancat kanë mbërritur në vendngjarje tani, ku së paku dy anëtarë të një familjeje, kolegë tanë, janë vrarë dhe gjashtë të tjerë janë plagosur. Ne jemi të tmerruar nga ajo që ka ndodhur”, shkroi ky grup në rrjetin social X.

Sulmi ndodhi në Muwasi, një pjesë ranore, e pazhvilluar e tokës përgjatë bregdetit, e cila është shndërruar në një kamp tendash për palestinezët e zhvendosur, i cili ofron pak shërbime bazike.

Lufta nisi kur pjesëtarët e grupit të shpallur terrorist nga SHBA-ja, Hamas, e sulmuan Izraelin jugor më 7 tetor, duke i vrarë rreth 1.200 njerëz dhe duke i rrëmbyer afro 250 pengje. Rreth një e katërta e afro 130 pengjeve, që janë duke u mbajtur ende në Gazë, besohet se kanë vdekur.

Izraeli e ka bërë rrafsh me tokën shumicën e territorit palestinez si përgjigje ndaj sulmit të 7 tetorit.

Më shumë se 29.000 palestinezë janë vrarë nga sulmet izraelite prej atëherë, sipas Ministrisë së Shëndetësisë në Gazë.

Televizioni shtetëror i Sirisë thotë se një sulm izraelit që goditi një zonë të banuar në kryeqytetin e vendit, Damask, ka vrarë dy persona.

AP raporton se goditja dëmtoi katin e katërt të një ndërtese dhjetëkatëshe, thyen xhamat e dritareve në ndërtesat aty pranë dhe gjithashtu dëmtoi dhjetëra makina të parkuara në zonë.

Një autobus bosh i parkuar për shkollën private aty pranë Al-Bawader u dëmtua dhe njerëzit u panë duke nxituar drejt shkollës për të marrë fëmijët e tyre.

Nuk ka pasur asnjë koment nga ushtria izraelite, e cila rrallë pranon se ka sulmuar objektiva brenda Sirisë, shkruan The Guardian.

Shtetet e Bashkuara vendosën të martën veton ndaj një projekt-rezolute të Këshillit të Sigurimit që do të kërkonte një armëpushim të menjëhershëm humanitar në Gaza.

Projekt-rezoluta fitoi 13 vota pro midis 15 anëtarëve të Këshillit të Sigurimit. Shtetet e Bashkuara votuan kundër. Britania abstenoi.

Për t’u miratuar, një projekt-rezolutë e Këshillit të Sigurimit ka nevojë për të paktën nëntë vota pro dhe asnjë veto nga asnjë prej pesë anëtarëve të përhershëm të këshillit – Britania, Kina, Franca, Rusia, Shtetet e Bashkuara.

Rezoluta e hartuar nga Algjeria do të kishte kërkuar një armëpushim të menjëhershëm humanitar në Gaza dhe do të dënonte të gjitha sulmet kundër civilëve. Drafti do të kishte refuzuar zhvendosjen e detyruar të popullatës civile palestineze dhe do të kishte kërkuar qasje të papenguar humanitare në Gaza. Drafti gjithashtu do të kërkonte lirimin e menjëhershëm dhe pa kushte të të gjithë pengjeve.

Para votimit mbi projekt-rezolutën, ambasadorja e SHBA në Kombet e Bashkuara, Linda Thomas-Greenfield, tha se drafti algjerian do të rrezikonte përpjekjet e vazhdueshme drejt një marrëveshjeje pengjesh. Ajo tha se delegacioni i saj po punonte për një projekt-rezolutë rivale që do të bënte thirrje për një “armëpushim të përkohshëm” bazuar në formulën që të gjithë pengjet të lirohen.

Përfaqësuesi i përhershëm i Rusisë në Kombet e Bashkuara, Vassily Nebenzia, tha para votimit se Uashingtoni vazhdon t’i japë Izraelit “licencë për të vrarë”. Ai u kërkoi anëtarëve të Këshillit të Sigurimit “të kundërshtojnë paligjshmërinë e Uashingtonit”.

Duke folur pas votimit, Nebenzia tha se përgjegjësia e plotë për pasojat e rezultatit të së martës bie mbi Uashingtonin, pavarësisht se sa fort përpiqen Shtetet e Bashkuara t’i shmangen duke folur për “përpjekjet e tyre të rëndësishme ndërmjetësuese”.

Hamasi ka konfirmuar se ka marrë një ngarkesë droge dhe tashmë ka filluar shpërndarjen e tyre tek pengjet që po mban në Rripin e Gazës, tha ministria e jashtme e Katarit.

Falë ndërmjetësimit të Katarit dhe Francës, muajin e kaluar u arrit një marrëveshje për dërgimin urgjent të barnave të nevojshme për pengjet e Hamasit në këmbim të ndihmës humanitare, përfshirë ilaçet, të destinuara për popullatën civile në Rripin e Gazës.

“Katari është konfirmuar si ndërmjetës në marrëveshjen, e cila përfshin hyrjen e barnave dhe dërgimin e ndihmave humanitare për civilët në Rripin e Gazës.

Vçanërisht në zonat më të prekura dhe të dëmtuara, në këmbim të dërgesës së barnave të nevojshme për pengjet që mbeten në enklavën palestineze“, tha zëdhënësi i Ministrisë së Jashtme të Katarit, Majid al-Ansari.

Sipas një analize të re gjithëpërfshirëse të publikuar nga Global Nutrition Cluster, një rritje e madhe e kequshqyerjes mes fëmijëve, grave shtatzëna dhe gjidhënëse në Rripin e Gazës përbën kërcënim të rëndë për shëndetin e tyre.

Mes luftës së Izraelit ndaj Gazës, ushqimi dhe uji i sigurt janë bërë tepër të pakta dhe sëmundjet janë të përhapura, duke kompromentuar ushqimin dhe imunitetin e grave dhe fëmijëve dhe duke rezultuar në një rritje të kequshqyerjes akute, shkroi unicef.org.

Raporti, Vulnerabiliteti i të ushqyerit dhe Analiza e Situatës, zbulon se është veçanërisht ekstreme në Rripin verior të Gazës, i cili është ndërprerë pothuajse plotësisht nga ndihmat për javë të tëra. Ekzaminimet e të ushqyerit të kryera në strehimoret dhe qendrat shëndetësore në veri zbuluan se 15.6 përqind ose 1 në 6 fëmijë nën 2 vjeç janë të kequshqyer në mënyrë akute. Nga këto, pothuajse 3 për qind vuajnë nga humbja e rëndë, forma më kërcënuese për jetën e kequshqyerjes, e cila i vë fëmijët e vegjël në rrezikun më të lartë të komplikimeve mjekësore dhe vdekjes, nëse nuk marrin trajtim urgjent.

“Rripi i Gazës është gati të dëshmojë një shpërthim në vdekjet e fëmijëve të parandalueshme, gjë që do të komplikonte nivelin tashmë të padurueshëm të vdekjeve të fëmijëve në Gaza”, tha Zëvendës Drejtori Ekzekutiv i UNICEF-it për Veprimet Humanitare dhe Operacionet e Furnizimit, Ted Chaiban.

SHBA tha se nuk pajtohet me presidentin brazilian Luiz Inacio Lula da Silva i cili e krahasoi luftën izraelite kundër Rripit të Gazës me Holokaustin e Adolf Hitlerit kundër hebrenjve.

“Natyrisht ne nuk pajtohemi me ato komente,” u tha gazetarëve zëdhënësi i Departamentit të Shtetit, Matthew Miller . “Ne kemi qenë mjaft të qartë se nuk besojmë se ka ndodhur gjenocid në Gaza.”

Zyrtarët izraelitë denoncuan deklaratat e da Silva, me Ministrinë e Jashtme që njoftoi se do të thërriste të dërguarin e vendit të Amerikës së Jugut për të paraqitur një protestë zyrtare.

Izraeli ka goditur Rripin e Gazës që nga sulmi i Hamasit më 7 tetor . Sulmet izraelite që pasuan kanë vrarë rreth 29,000 dhe kanë shkaktuar shkatërrim masiv dhe mungesë të gjërave të nevojshme, ndërsa më pak se 1,200 izraelitë besohet se janë vrarë në sulmin e Hamasit.

Lufta izraelite ka shtyrë 85% të popullsisë së Gazës në zhvendosje të brendshme mes mungesës akute të ushqimit, ujit të pastër dhe ilaçeve, ndërsa 60% e infrastrukturës së enklavës është dëmtuar ose shkatërruar, sipas OKB-së.

Izraeli akuzohet për gjenocid në Gjykatën Ndërkombëtare të Drejtësisë me bazë në Hagë, e cila lëshoi ​​një vendim të përkohshëm në janar që urdhëron Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.