Human Rights Watch ka akuzuar Izraelin se nuk ka respektuar një urdhër të gjykatës ndërkombëtare për të ofruar ndihmë urgjente për njerëzit në Gaza.
Gjykata Ndërkombëtare e Drejtësisë – gjykata më e lartë e OKB-së – dha një përgjigje paraprake për çështjen e gjenocidit të Afrikës së Jugut kundër Izraelit muajin e kaluar, duke i kërkuar atij të bëjë gjithçka që mundet për të parandaluar vdekjen dhe shkatërrimin në rajon.
Ai nuk dha urdhër për t’i dhënë fund ofensivës izraelite, shkruan SkyNews.
GJND-ja urdhëroi Izraelin të ndiqte gjashtë masa të përkohshme, duke përfshirë marrjen e “masave të menjëhershme dhe efektive për të mundësuar ofrimin e shërbimeve bazë të nevojshme urgjente dhe ndihmës humanitare” për palestinezët në Gaza.
Por Human Rights Watch tha se Izraeli nuk ishte në përputhje me urdhrin për ofrimin e ndihmës dhe tha se numri mesatar i kamionëve me ndihma që hynin në enklavë kishte rënë me 30 për qind në javët pas vendimit.
Izraeli “vazhdon të pengojë ofrimin e shërbimeve bazë dhe hyrjen dhe shpërndarjen brenda Gazës të karburantit dhe ndihmës për shpëtimin e jetës”, tha organizata.
“Qeveria izraelite po i vret urie 2.3 milionë palestinezët e Gazës, duke i vënë ata në rrezik edhe më të madh se përpara urdhrit të detyrueshëm të gjykatës botërore”, tha drejtori i Izraelit dhe Palestinës i HRW, Omar Shakir.
Izraeli mohon se po kufizon dërgesat e ndihmave në Gaza.
GJND-ja i kishte kërkuar Izraelit që t’i raportonte brenda një muaji nga vendimi i tij – data e sotme – por është e paqartë nëse e ka bërë këtë.
