Golden Eagle Ylli ka vazhduar me fitore, duke mundur Kamza Basket me rezultat 89:75 (30:21, 22:9, 16:24, 21:21), në kuadër të xhiros së pestë në Ligën Unike.
Vendasit e nisën ndeshjen shumë më mirë, me një seri prej 12:2, dhe ishin vazhdimisht në epërsi, duke e fituar çerekun e parë me rezultat 30:21.
Therandasit vazhduan me lojë të mirë edhe në periudhën e dytë, duke e thelluar më shumë epërsinë, ku më e larta ishte 52:29, ndërsa pjesa e parë përfundoi me rezultat 52:30.
Në periudhën e tretë ishte lojë më e barabartë, me mysafirët që ngushtuan shifrat dhe e fituan këtë pjesë 16:24, ndërsa rezultati në semafor pas 30 minutash ishte 68:54. 10 minutat e fundit ishin tërësisht të barabartë dhe kjo bëri që Ylli të triumfojë me rezultat 89:75.
Golden Eagle Ylli ka katër fitore dhe një humbje, kurse Kamza Basket ka dy fitore dhe tri humbje.
