Refugjatët ukrainas të shpërndarë nëpër Evropën Qendrore mbushën kishat të dielën për Pashkët Ortodokse, në festime të hidhura: duke falënderuar për arratisjen nga pushtimi rus, por duke ëndërruar për një kthim në shtëpi me familjen dhe miqtë e lënë pas, shkruan The Guardian, transmeton Bota sot.
Më shumë se 5 milionë ukrainas kanë ikur që nga pushtimi i Rusisë, me shumicën që kërkon strehim përtej kufijve në Poloni, Sllovaki, Hungari dhe Rumani.
Reuters raportoi skena në Poloni dhe Gjermani:
Në katedralen ortodokse të Varshavës, Shën Maria Magdalena, në qendër të qytetit, ku priftërinjtë thanë se shërbimet e festave ishin më të ngarkuara se vitet e kaluara, fëmijët mbanin shporta të Pashkëve të stolisur me flamuj ukrainas dhe kishin harqe blu dhe të verdhë në flokët e tyre.
"Kjo është festa ime e parë e Pashkëve që nuk po e kaloj në Ukrainë...por për fat të mirë ka shumë njerëz nga Ukraina këtu," tha Anna Janushevich, 35 vjeç, e cila iku nga Lviv.
“Kur të përfundojë lufta, unë do të kthehem në Ukrainë. Unë ëndërroj që do të mund të kthehem që të mund të festoj Pashkët në shtëpinë time dhe që vajza ime të jetë me familjen e saj".
Ashtu si shumë shokë të tjerë që shkojnë në kishë, Bohdana Dudka, 27 vjeç, shkrepi foto për t'ua dërguar në shtëpi anëtarëve të familjes, përfshirë dy vëllezërit e saj që mbetën në Ukrainë për të luftuar.
Në kishën Nathanael të Berlinit, udhëheqësit e komunitetit ukrainas thanë se kongregacioni prej rreth 500 do të rritet në 2500 njerëz për festimet ku refugjatët thanë se këndimi dhe traditat u kujtonin atyre shtëpinë. Më shumë se 369,000 ukrainas janë regjistruar në Gjermani pasi u larguan nga lufta.
Diana Shyndak, 23 vjeç, me origjinë nga Kievi tha: “Është festa ime e parë e Pashkëve jo në Ukrainë. Është e trishtueshme dhe zemra ime dhemb sepse kaq shumë njerëz kanë vdekur. Ne lutemi çdo ditë për njerëzit tanë dhe fëmijët tanë".
