Kryeministri polak Mateusz Morawiecki deklaroi sot se vendi i tij dëshiron të përfshijë Izraelin në procesin e negociatave me qeverinë gjermane në lidhje me pagesën e kompensimit për humbjet gjatë Luftës së Dytë Botërore.
“Ne duam të zhvillojmë bisedime në Berlin dhe gjithashtu të ftojmë përfaqësues të Izraelit. Në fund të fundit, gjysma e viktimave polake ishin qytetarë me origjinë hebre”, tha Morawiecki në një intervistë për “Spiegel”.
Morawiecki nuk përjashtoi që Polonia mund t'i drejtohet gjykatave ndërkombëtare më vonë.
Në fillim të muajit, autoritetet polake njoftuan se po kërkonin rreth 1.3 trilion dollarë nga Gjermania si kompensim për dëmet e Luftës së Dytë Botërore.
Qeveria gjermane ka deklaruar vazhdimisht se nuk ka ndërmend të bëjë pagesa ndaj Polonisë, pasi në Berlin besojnë se tashmë kanë paguar dëmshpërblime të mëdha, duke deklaruar se Varshava zyrtare hoqi dorë nga dëmshpërblimet në vitin 1953.
