Uragani Fiona arriti sot në Republikën Domenikane dhe Porto Riko po përgatitet për një ditë tjetër të përmbytjeve të rrezikshme nga reshjet e dendura, tha një agjenci qeveritare amerikane një ditë pasi pothuajse i gjithë ishulli amerikan humbi energjinë.
Republika Domenikane u godit nga reshje jashtëzakonisht të mëdha shiu dhe erëra me shpejtësi rreth 140 kilometra në orë, tha Eric Blake i Qendrës Kombëtare të Uraganeve të SHBA-së (NHC), ndërsa stuhia në Porto Riko ka filluar të zbehet.
Uragani Fiona arriti në Porto Riko dje pasdite, pesë vjet pasi territori i Karaibeve të SHBA u shkatërrua nga uragani Maria.
Pothuajse 90 për qind e Porto Rikos ishte pa energji sot, thanë zyrtarët, duke paralajmëruar se do të duheshin ditë për të rilidhur të gjithë ishullin prej 3.3 milionë banorësh.
Rrjeti energjetik i Porto Rikos mbeti i brishtë pasi uragani Maria në shtator 2017 shkaktoi ndërprerjen më të madhe në historinë e SHBA-së.
Në stuhinë e atëhershme të kategorisë 5 kishin humbur jetën mbi 3.000 njerëz, ndërsa mijëra portorikanë jetojnë ende nën çatitë e improvizuara me pëlhurë gome.
Presidenti i SHBA-së, Joe Biden miratoi dje shpalljen e gjendjes së jashtëzakonshme në Porto Riko, duke autorizuar Agjencinë Federale të Menaxhimit të Emergjencave të koordinojë ndihmën ndaj fatkeqësive dhe të sigurojë masa mbrojtëse emergjente.