Presidenti Vladimir Putin u uroi bashkëqytetarëve të tij “Gëzuar Vitin e Ri” disa kilometra larg kufirit me Ukrainën.
Urimi i tij u bë teksa ai ishte i rrethuar nga një sërë personash të veshur me uniformë ushtarake.
Por a ishin vërtet ushtarë ata në anën e të fortit të Kremlinit?
Ose thjesht Kremlini rekrutoi aktorë, të afërm të Putinit dhe mbështetësit e tij të zjarrtë që thjesht veshin uniformën ushtarake për të treguar qëndrueshmërinë e Rusisë në luftën kundër Ukrainës, pyesin shumë media ndërkombëtare.
Siç është raportuar nga rrjeti televiziv francez BFMTV, disa raporte të huaja thanë se në fjalimin e tij të Vitit të Ri të shtunën, nga selia e distriktit ushtarak në Rostov-on-Don, Rusia perëndimore, Putin ishte i rrethuar nga ushtarë “të rremë”, të cilët nuk ishin gjë tjetër veçse aktorë, të afërm dhe përkrahës të flaktë të tij.
Duke iu drejtuar popullit rus, presidenti përshëndeti ata që ai i quajti “heronj” që luftojnë për atdheun e tyre ndërsa lufta kundër Ukrainës është zvarritur për rreth një vit. “Ne do ta bëjmë vendin tonë të madh dhe të pavarur”, theksoi Putin, duke shprehur në të njëjtën kohë sigurinë e tij për fitoren e vendit të tij ndaj Ukrainës.
Dyshimet për ushtarët “fake” u përforcuan kur gazetari bjellorus Tadeuts Zhiskan vuri re në Twitter se në të djathtë të Putinit ishte një grua bjonde ruse që është shfaqur në krah të tij edhe në raste të tjera, por në role të ndryshme.
Në një foto, zonja bionde ka veshur rroba të marinës, ndërsa në një tjetër, ajo shfaqet si një nga besimtarët gjatë një shërbimi në kishë: dhe, çdo herë, në krah të Putinit.
“Fotografitë japin përshtypjen se gruaja është përdorur në disa raste për të shoqëruar presidentin në daljet e tij zyrtare. Si ushtare, si marinare dhe si i krishtere besnike”, nënvizon gazetari.
“Është emocionuese. Kush eshte ajo; Truproje; Aktore;”, pyet gazetarja e CNN, Clarissa Ëard, duke cituar versionin e saj në Tëitter. Gazetarja vuri në dukje nga ana e saj se edhe persona të tjerë shfaqen vazhdimisht pranë presidentit rus. Sipas disa mediave, përfshirë gazetën zvicerane “Switzerland Times”, biondja është Sergina Karisha Borisnova, 57 vjeçe, nga qyteti i Novgorodit, anëtare e “Rusisë së Bashkuar”, partisë së Vladimir Putinit. Ajo shfaqet edhe në faqen e internetit të “Dumës”, dhomës së ulët të parlamentit rus, ku prezantohet si një nga anëtarët e saj. Duke nxituar të komentojë paraqitjen e presidentit rus përkrah ushtarëve, fituesja e çmimit Nobel për Paqen 2022, Oleksandra Matvichuk, që është presidente e OJQ-së “Qendra ukrainase për liritë politike”, por edhe kundërshtare e Vladimir Putinit, thotë me një stil kaustik: “Putini donte të kopjonte homologun e tij ukrainas, Volodymyr Zelensky, i cili kishte shkuar për të parë luftëtarët ukrainas në qytetin e Bakhmut. Por pas dhjetë muajsh lufte në shkallë të gjerë, edhe aktorët janë të paktë”. Dje, ushtria ukrainase pretendoi se u kishte shkaktuar viktima të rënda forcave ruse në Bakhmut, qyteti i vogël në Ukrainën lindore, që ka qenë skena e luftimeve të ashpra për muaj të tërë.
