Sipas një organizate humanitare, të paktën 171.843 persona janë zhvendosur në veriperëndim të Sirisë nga tërmetet e javës së kaluar që goditën Turqinë jugore.
“Ndihma e OKB-së akoma është brenda kufijve minimal, ku vetëm 114 kamionë kanë arritur në një javë, 93 për qind e të cilëve erdhën përmes vendkalimit Bab al-Hawa, pavarësisht hapjes së dy kalimeve shtesë”, tha organizata joqeveritare “Koordinimi i Reagimit të Sirisë”.
Organizata shtoi se 24 kamionë të tjerë ndërkombëtarë pritet të hyjnë përmes vendkalimeve Bab al-Hawa dhe Bab al-Salameh.
“Koordinimi i Reagimit të Sirisë” kritikoi “politizimin e madh” të ndihmave humanitare që vijnë, veçanërisht të atyre ndërkombëtare si dhe drejtimin e sasive të mëdha të ndihmave në zonat e kontrolluara nga regjimi të cilat morën “90 për qind të ndihmës për viktimat e tërmetit”.
Në Siri të paktën 3.688 persona humbën jetën dhe 14.749 të tjerë u plagosën nga dy tërmetet e fuqishme që goditën Turqinë jugore më 6 shkurt. Epiqendra e tërmeteve me magnitudë 7.7 dhe 7.6 ballë ishte në provincën turke Kahramanmaraş, duke prekur një zonë të madhe me mbi 13 milionë banorë.
