Rusia tha të enjten se furnizimet e Perëndimit me armë të avancuara në Ukrainë po gjenin rrugën e tyre në tregun e zi dhe më pas në duart e grupeve ekstremiste dhe kriminale në Lindjen e Mesme, Afrikën Qendrore dhe Azinë, citon Reuters.
Që kur Rusia nisi luftën e saj me Ukrainën më 24 shkurt, pushtimi më i madh tokësor në Evropë që nga Lufta e Dytë Botërore, fuqitë perëndimore i kanë dërguar Ukrainës një sërë armësh në përpjekje për të ndihmuar forcat që luftojnë kundër trupave ruse.
Maria Zakharova, zëdhënësja e Ministrisë së Jashtme të Rusisë, tha se anëtarët e NATO-s kanë dërguar në total të paktën 700 sisteme artilerie, 80,000 sisteme raketash, 800,000 predha artilerie dhe 90 milionë fishekë.
“Një pjesë e konsiderueshme e këtyre armëve tashmë kanë hyrë ose do të hyjnë së shpejti në tregun e zi”, u tha Zakharova gazetarëve në Moskë. “Tani komuniteti botëror po përballet me këtë.”
Ajo nuk tha se në çfarë provash bazohej pohimi i saj.
“Ngarkesat ushtarake të NATO-s po përfundojnë në duart e terroristëve, ekstremistëve dhe grupeve kriminale në Lindjen e Mesme, Afrikën Qendrore dhe Azinë Juglindore”, shtoi Zakharova.
Rusia ka paralajmëruar prej kohësh se armët e destinuara për Ukrainën mund të gjejnë rrugën e tyre në duart e kriminelëve, por pa dhënë detaje se ku mund të përfundojnë armët.
Udhëheqësit perëndimorë thonë se duan të ndihmojnë Ukrainën të mposht Rusinë, megjithëse presidenti i SHBA Joe Biden ka kërkuar të parandalojë një konfrontim të drejtpërdrejtë NATO-Rusi. Ukraina po kërkon më shumë armë nga Shtetet e Bashkuara dhe aleatët e saj.
Megjithatë, disa zyrtarë të sigurisë janë të shqetësuar.
Kreu i Interpolit, Jürgen Stock, tha në qershor se disa nga armët e avancuara të dërguara në Ukrainë do të përfundonin në duart e grupeve të krimit të organizuar.
Europol tha në korrik se po punonte ngushtë me Ukrainën për të zbutur kërcënimin e trafikut të armëve. “Një kërcënim i mundshëm i vërejtur në zonat e luftës në të kaluarën është se armët e zjarrit mund të bien në duar të gabuara”, thuhej në atë kohë.
“Lidhur me luftën në Ukrainë, Europol ka paralajmëruar se përhapja e armëve të zjarrit dhe eksplozivëve në Ukrainë mund të çojë në një rritje të armëve të zjarrit dhe municioneve të trafikuara në BE nëpërmjet rrugëve të kontrabandës ose platformave online. Ky kërcënim mund të jetë edhe më i lartë pasi konflikti të ketë përfundoi”.
Zakharova tha se Bashkimi Evropian ishte një palë në konfliktin në Ukrainë, sepse blloku kishte furnizuar një mori armësh të avancuara në Kiev.
