Një sulm ajror në kryeqytetin e Sudanit, Khartoum, ka vrarë të paktën 17 persona, përfshirë pesë fëmijë, ndërsa luftimet vazhdojnë mes gjeneralëve rivalë që kërkojnë të kontrollojnë vendin.
Sulmi i së shtunës ishte një nga përleshjet më vdekjeprurëse në zonat urbane të Khartoum dhe gjetkë në Sudan midis ushtrisë dhe një grupi të fuqishëm paraushtarak të njohur si Forcat e Mbështetjes së Shpejtë ( RSF).
Sipas ministrisë së shëndetësisë të Sudanit, bombardimi goditi lagjen Yarmouk në Khartoum jugor, ku përleshjet janë përqëndruar javët e fundit. Zona strehon një strukturë ushtarake të kontrolluar nga ushtria.
Një numër i viktimave civile u dërguan në Spitalin Bashair, tha ministria në një postim në Facebook , dhe të paktën 25 shtëpi u shkatërruan.
Nuk ishte e qartë nëse sulmi ishte me avion apo me dron. Avionët e ushtrisë kanë shënjestruar vazhdimisht trupat RSF, ndërsa forcat paraushtarake thuhet se kanë përdorur drone dhe armë kundërajrore kundër pozicioneve të ushtrisë.
