Është publikuar një audio incizim në të cilin kreu i Wagner, Yevgeny Prigozhin, pretendon se “marshimi i tij i drejtësisë” ishte i drejtuar kundër tradhtarëve dhe se ai pret “fitore të reja në front”.
Audio incizimi u publikua nga kanali Grey Zone nw Telegram, i cili sipas mediave ruse, është i lidhur ngushtë me Wagner Group.
“Sot, më shumë se kurrë, kemi nevojë për mbështetjen tuaj. Faleminderit për këtë. Unë dua që ju të kuptoni se Marshi ynë i Drejtësisë kishte për qëllim luftimin e tradhtarëve dhe mobilizimin e shoqërisë sonë. Dhe mendoj se kemi arritur shumë”, tha Prigozhin.
“Në të ardhmen e afërt, jam i sigurt se do të shihni fitoret tona të reja në front. Faleminderit djema”, tha kreu i grupit mercenar rus.
Megjithatë, nuk është e qartë se kujt i referohet saktësisht fitoreve.
Nuk dihet gjithashtu se kur është regjistruar audio incizimi, kurse deklarata e tij e fundit është publikuar më 26 qershor.
Pasi i dha fund rebelimit kundër autoriteteve ruse, ai tha se Wagner rezultoi të ishte formacioni më efektiv luftarak në Rusi.
Prigozhin u pa për herë të fundit publikisht në një automjet në Rostov më 24 qershor, ndërsa rebelimi vazhdonte ende.
