Nacionalistët populistë të partisë në pushtet të Polonisë, Ligj dhe Drejtësi (PiS) dhanë të mërkurën miratimin për fillimin e punës së komisionit të diskutueshëm për të luftuar “ndikimin rus”, mes akuzave se synimi kryesor i saj është të dëmtojë opozitën, një muaj e gjysmë përpara se të mbahen zgjedhjet në vend.
Shumica parlamentare zgjodhi nëntë anëtarët e komisionit, ndërsa e gjithë opozita refuzoi të propozonte kandidatët e saj dhe vendosi të abstenojë nga votimi, pasi e cilëson institucionin e ri si “të paligjshëm” dhe “antikushtetues”. Nuk është dhënë asnjë sqarim për datën se kur do të fillojë punën komisioni.
Një version i ndryshuar i ligjit për krijimin e tij u nënshkrua nga presidenti polak Andrzej Duda në fillim të gushtit. Teksti parashikon se komisioni do të jetë në gjendje të gjykojë nëse një person “veproi nën ndikimin rus” dhe kështu “nuk garanton kryerjen e mirë të aktiviteteve [qeveritare] në interes publik.”
Mëgjithatë, në versionin e ri u fshi një dispozitë që parashikonte se vendimi i komisionit do të përfshinte heqjen e detyrueshme të së drejtës për t’u zgjedhur dhe për të mbajtur poste publike. Për më tepër, është shtuar një dispozitë që parashikon procedurat e apelimit, për të cilat do të jetë përgjegjës Bordi i Apelimit të Varshavës.
Gjatë gjithë procesit legjislativ, teksti ngjalli reagime të forta, si në Poloni ashtu edhe jashtë saj. Pasi versioni fillestar i projektligjit u miratua në fund të majit, Departamenti i Shtetit shprehu shqetësimin se ai mund të “përdoret në një mënyrë abuzive” dhe të parandalojë mbajtjen e “zgjedhjeve të lira dhe të ndershme në Poloni”.
