Modi feston, Putini merr frymë me lehtësi dhe Zelensky pëson një tjetër dështim. Ky, në përmbledhje, është rezultati i polemikave mbi deklaratën përfundimtare të G20.
Udhëheqësit e G20 përfunduan dy ditë bisedime të nivelit të lartë në Indi duke arritur atë që kishin vendosur të arrinin, një deklaratë përfundimtare të samitit që të gjitha palët mund ta miratonin.
Por shumë mbetën duke pyetur: “Me çfarë kostoje?”.
Teksa boja thahej në komunikatën e samitit prej 35 faqesh të përmbledhur gjatë negociatave nga vendet më me ndikim të botës, anëtarët e G20 po luftonin me një “kor kritikash” rreth mospërfilljes së ndonjë referimi specifik për rolin e Rusisë si agresor në luftën kundër Ukrainës.
Ukraina, duket se është ndjerë e fyer, dhe sipas tyre nuk kishte "asgjë për të qenë krenarë" kur ishte fjala për dështimin për të denoncuar Rusinë në mënyrë specifike në deklaratën e përbashkët në Nju Delhi.
Dukshëm, deklarata pasqyronte një pozicion shumë më të butë nga ata që Shtetet e Bashkuara dhe aleatët e saj perëndimorë kanë adoptuar individualisht. Por zyrtarët perëndimorë e mbrojtën rezultatin, me deklarata nga disa liderë shtetesh apo edhe diplomatë të ndryshëm.
Ukraina jashtë loje
Konsensusi nuk pritej dhe është një surprizë. Pikëpamjet diametralisht të kundërta mbi luftën kërcënuan të pengonin takimin në javët para samitit, u ekspozuan edhe më tepër.
Ukraina kritikoi deklaratën përfundimtare të G20, me zëdhënësin e Ministrisë së Jashtme të Ukrainës, Oleg Nikolenko, duke shkruar në Facebook: “Ukraina është mirënjohëse ndaj partnerëve të saj që u përpoqën të përfshinin formulime të forta në tekst.
Në të njëjtën kohë, G20 nuk ka asgjë për të qenë krenare në pjesën e agresionit të Rusisë kundër Ukrainës. Natyrisht, pjesëmarrja e palës ukrainase do t'u kishte lejuar pjesëmarrësve të kuptonin më mirë situatën.
Parimi i 'asgjë në lidhje me Ukrainën pa Ukrainën' mbetet po aq kyç si kurrë më parë”.
Faji i Perëndimit
Ndërkohë Sekretari amerikan i Shtetit Antony Blinken këmbënguli se deklarata e përbashkët për pushtimin rus të Ukrainës "flet me zë të lartë".
“Nëse jeni në vendin e Rusisë, është shumë e qartë se ku qëndron pjesa tjetër e botës,” tha ai për CNN.
Këshilltari i Sigurisë Kombëtare të SHBA-së, Jake Sullivan, u tha gazetarëve se deklarata e samitit "bëri një punë të mirë për të mbrojtur parimin se shtetet nuk mund të përdorin forcën për të fituar territor ose për të shkelur integritetin territorial dhe sovranitetin ose pavarësinë politike të vendeve të tjera".
Gjermania dhe Britania e mirëpritën gjithashtu rezolutën. Presidenti francez Emmanuel Macron tha se G20, i cili u krijua për të zgjidhur çështjet ekonomike ndërkombëtare, nuk është një vend ku domosdoshmërisht duhet të pritet përparim diplomatik në lidhje me luftën, por ai tha se deklarata nuk ishte fitore diplomatike për Rusinë.
Suksesi i Rusisë
Rusia nga ana tjetër, e konsideroi Samitin e G20 në kryeqytetin e Indisë Nju Delhi një "sukses të pakushtëzuar", një ditë pasi deklarata përfundimtare nuk dënoi në mënyrë eksplicite pushtimin e saj në Ukrainë.
Duke folur në një konferencë për shtyp në fund të samitit, ministri i Jashtëm Sergei Lavrov tha se samiti ishte një sukses jo vetëm për Indinë, por "për të gjithë ne".
Ai tha se për shkak të qëndrimit të palëkundur të konsoliduar të vendeve të Jugut Global, Rusia ishte në gjendje të siguronte që axhenda e G20 të mos “errësohej” nga konflikti ukrainas.
Lavrov tha gjithashtu se Rusia është e gatshme të kthehet në marrëveshjen e grurit të Detit të Zi sapo të plotësohen kushtet e tyre.
Rusia u largua nga marrëveshja në korrik, 1 vit pasi ajo u ndërmjetësua nga Kombet e Bashkuara dhe Turqia, duke u ankuar se eksportet e saj të ushqimit dhe plehrave përballen me pengesa dhe se gruri i mjaftueshëm ukrainas shkon në vendet e cenueshme.
Sakaq, India i dorëzoi zyrtarisht Brazilit presidencën e G20-ës në ceremoninë e mbylljes së samitit vjetor të grupit të ekonomive të mëdha.
Një tjetër fitore për Putinin, pasi presidenti i Brazilit e siguroi se nuk do të arrestohet nëse shkel në vendin e tij.
