Bullgaria ka rënë dakord këtë të enjte të rifillojë importet e grurit ukrainas, pas kufizimit të importeve për shkak të konkurrencës me kultivuesit vendas.
Asambleja Kombëtare Bullgare votoi për të lejuar rifillimin e importeve pasi kryeministri Nikolai Denkov, tha se heqja e këtij vendimi do të ulte çmimet e ushqimeve, dhe se qeveria do t’i kërkojë Komisionit Evropian të sigurojë kompensim për fermerët për të kompensuar ndikimin e fluksit të tarifave falas të grurit ukrainas.
Ministri i Bujqësisë, Kiril Vatev, tha se rifillimi i importeve nuk do të ndikonte negativisht në ekonominë e vendit, por se Bullgaria do të rrisë kontrollet kufitare mbi importet ukrainase ndërsa do të shtojë kërkimet për materiale radioaktive dhe metale të rënda.
Ndërprerjet u zbatuan pasi fermerët në Bullgari, Poloni, Hungari, Rumani dhe Sllovaki kundërshtuan vendimin e Bashkimit Evropian verën e kaluar, për të lejuar importet pa tarifa të grurit ukrainas në tregun e përbashkët evropian, transmeton KlanKosova.tv.
Në fillim të këtij viti, Komisioni Evropian ra dakord të lejojë vendet kundërshtuese të kufizojnë importet ukrainase të grurit, misrit e farave të lulediellit ukrainas.
Të martën, Këshilli i Ministrave Polakë i bëri thirrje Komisionit Evropian që të zgjasë ndalimin përtej afatit të së premtes. Vendimit të Polonisë i janë bashkangjitur edhe Hungaria dhe Sllovakia.
Kryeministri ukrainas Denys Shmyhal thotë se kombi i tij do t’i drejtohet drejtpërdrejt Organizatës Botërore të Tregtisë nëse Polonia nuk e kthen qëndrimin e saj.
