Udhëheqësi i Koresë së Veriut Kim Jong-un u largua nga Lindja e Largët Ruse me trenin e tij të blinduar, duke përfunduar vizitën e tij në Rusi që filloi të martën, sipas mediave ruse.
Ceremonia e nisjes së liderit të Koresë së Veriut u zhvillua në stacionin Artyom-Primorsky 1, ku ndodhej treni i blinduar i Kim Jong Un, siç raporton agjencia Ria Novosti. Në një video të publikuar nga agjencia, Kim, i cili rrallë udhëton jashtë vendit të tij, mund të shihet duke ecur në një tapet të kuq drejt trenit të tij dhe duke u përshëndetur me të pranishmit.
“Treni i Kim Jong Un është nisur për në stacionin kufitar Hasan. Distanca është rreth 250 kilometra”, raportoi agjencia e lajmeve TASS.
Më herët sot, Kim mori si dhuratë nga guvernatori i rajonit Primorye pesë drone të pajisur me eksploziv, një dron zbulimi dhe një jelek antiplumb, sipas TASS. Dhuratat shumë simbolike rrisin frikën në Perëndim për një marrëveshje të mundshme për dërgimin e armëve dhe municioneve nga Koreja e Veriut, për të cilën Moska ka nevojë për ofensivën e saj në Ukrainë.
