Viktor Sokolov, komandanti i flotës ruse të Detit të Zi në Krime, është treguar duke marrë pjesë në një takim, një ditë pasi forcat speciale ukrainase pretenduan se ai vdiq në një breshëri raketash.
Në videon dhe fotografitë e publikuara nga ministria ruse e mbrojtjes dhe të shfaqura në televizionin shtetëror të martën, Sokolov shihet duke marrë pjesë në një video-konferencë me ministrin e Mbrojtjes Sergej Shoigu dhe admiralë të tjerë të lartë dhe shefa të ushtrisë, shkruan Al Jazeera.
Forcat speciale të Ukrainës thanë të hënën se Sokolov u vra në gadishullin e aneksuar nga Rusia së bashku me 33 oficerë të tjerë në një sulm me raketa në selinë e flotës ruse të Detit të Zi në portin e Sevastopolit.
Deklarata shtoi se 105 të tjerë u plagosën në sulme.
Ndërsa raporti nuk përmend emrin e Sokolov, Anton Gerashchenko, këshilltar i ministrit të punëve të brendshme të Ukrainës, postoi emrin e admiralit dhe një foto në mediat sociale.
Ministria e Mbrojtjes lëshoi një deklaratë duke thënë se takimi ishte zhvilluar më herët gjatë ditës dhe videoja tregon Sokolov që shfaqet disa herë në ekran – por pa folur.
Rusia ka pësuar një sërë sulmesh në portin e rëndësishëm strategjik të Sevastopolit muajt e fundit.
