Një letër nga qeveria ukrainase drejtuar vendeve të G7 thotë se disa nga komponentët e përdorur në prodhimin e dronëve të tipit Shahed vijnë nga kompani me bazë në Perëndim, raportoi The Guardian më 27 shtator.
Letra pretendon se më shumë se 50 komponentë elektrikë erdhën fillimisht nga kompani të vendosura në vende që janë aleate me Ukrainën dhe të përfshira në koalicionin e sanksioneve. Vendet e përmendura përfshijnë SHBA-në, Zvicrën, Holandën, Gjermaninë, Poloninë, Kanadanë dhe Japoninë.
Sipas letrës, dronët e tipit Shahed që përdorin komponentë perëndimor janë përdorur në të paktën 600 sulme në Ukrainë, prëcjell Bota sot.
Dronët, të cilët u prodhuan fillimisht në Iran dhe u përdorën për herë të parë në sulmet kundër Ukrainës në shtator 2022, janë të lirë për t'u prodhuar dhe kur përdoren në tufa mund të jenë "një dhimbje koke" për mbrojtjen ajrore ukrainase, tha zëdhënësi i Forcave Ajrore, Yurii Ihnat.
Ka pasur raporte të mëparshme se dronët Shahed po prodhoheshin me pjesë nga vendet perëndimore, dhe letra më tej pretendon se Irani ka filluar të "shkëputet nga sigurimi i armëve Rusisë" dhe se "nuk mund të përballojë kërkesën ruse".
Si rezultat, vendet e prodhimit të dronëve janë zhvendosur në Rusi, përveç Iranit dhe në Siri, një tjetër aleat i Kremlinit.
Letra gjithashtu thekson se është e paqartë nëse kompanitë perëndimore të përmendura ishin plotësisht të vetëdijshme se komponentët e tyre po përdoreshin në prodhimin e dronëve, sepse pjesët janë kryesisht të një natyre komerciale dhe kështu janë të rregulluara dobët. Komponentët zakonisht kanë arritur në Iran përmes vendeve ndërmjetëse, duke shmangur kështu sanksionet.
Zëdhënësit e disa prej kompanive të identifikuara në letër kanë dënuar përdorimin e komponentëve të tyre në prodhimin e dronëve dhe kanë marrë pjesë në sanksione, por kanë pranuar se është "e vështirë të kontrollosh plotësisht shitjet gjatë gjithë jetës së një produkti".
