“Shtetet e Bashkuara i kanë kërkuar Izraelit të shtyjë ofensivën e tij tokësore deri në krijimin e një korridori humanitar”, raportoi e përditshmja Jerusalem Post, duke cituar Korporatën Publike të Transmetimeve Izraelite.
Sipas raportit, “ishte e paqartë se cila ishte përgjigja izraelite ndaj kërkesës”.
SHBA ka shprehur mbështetje të fortë për Izraelin në luftimin kundër grupit të Hamasit pas sulmit të tij një javë më parë, por gjithashtu ka shprehur shqetësimin për gjendjen e vështirë humanitare të mbi 2 milionë banorëve të Gazës, ku ishin vendosur sulmuesit.
Të premten, ushtria izraelite paralajmëroi 1.1 milionë banorë në veri të Gazës që të evakuohen "brenda 24 orëve".
OKB-ja ka paralajmëruar se do të ishte e pamundur që palestinezët në Gaza t'i binden urdhrit pa "pasoja shkatërruese humanitare".
Një javë më parë, forcat izraelite nisën një fushatë të qëndrueshme dhe të fuqishme ushtarake kundër Rripit të Gazës në përgjigje të një ofensive ushtarake të grupit palestinez, Hamas në territoret izraelite.
Konflikti filloi të shtunën e kaluar kur Hamasi nisi Operacionin Al-Aksa Flood – një sulm i befasishëm me shumë drejtime, duke përfshirë një breshëri lëshimesh raketash dhe depërtimesh në Izrael nëpërmjet tokës, detit dhe ajrit.
Hamasi tha se operacioni ishte në hakmarrje për sulmin ndaj xhamisë Al-Aksa në Jerusalemin Lindor të pushtuar dhe dhunës në rritje të kolonëve izraelitë kundër palestinezëve.
Ushtria izraelite më pas nisi operacionin ‘Shpatat e Hekurta’ kundër objektivave të Hamasit brenda Rripit të Gazës.
Kjo përgjigje është shtrirë në ndërprerjen e furnizimit me ujë dhe energji elektrike në Gaza.
