Shtetet e Bashkuara vendosën veton të mërkurën ndaj një rezolute të Këshillit të Sigurimit të Kombeve të Bashkuara që propozonte një pauzë humanitare për dërgimin e ndihmave në Gaza, me ambasadoren amerikane në OKB duke thënë se duhej më shumë kohë për të zhvilluar diplomacinë në terren.
“Po, rezolutat janë të rëndësishme. Dhe po, ky këshill duhet të flasë”, tha ambasadorja Linda Thomas-Greenfield. “Por veprimet që ne ndërmarrim duhet të informohen nga faktet mbi mbështetjen e përpjekjeve të diplomacisë direkte që mund të shpëtojnë jetë. Këshilli duhet ta marrë këtë të drejtë”.
Thomas-Greenfield tha gjithashtu se ShBA-ja ishte e zhgënjyer që rezoluta e cila gjithashtu bëri thirrje për lirimin e pengjeve dhe dënoi terrorizmin dhe aktet e dhunës kundër civilëve, nuk përmendi të drejtën e Izraelit për vetëmbrojtje, raporton CNN.
Drejtori i OKB-së për të drejtat e njeriut, Louis Charbonneau dënoi veton e ShBA-së, për të cilën ai tha se ndodhi “në një kohë të masakrës së paprecedentë”.
“Duke bërë këtë, ata bllokuan kërkesat për të cilat aq shpesh këmbëngulin në kontekste të tjera: të gjitha palët të respektojnë ligjin ndërkombëtar humanitar dhe të sigurojnë që ndihma jetike humanitare dhe shërbimet thelbësore të arrijnë njerëzit në nevojë”, tha Charbonneau për veton.
Ambasadori i Brazilit në OKB, presidenti i Këshillit të Sigurimit këtë muaj, tha në një deklaratë pas vetos së ShBA-së se “mbizotëronte heshtja dhe mosveprimi”, duke shtuar se ai shpresonte se “përpjekjet e aktorëve të tjerë do të jepnin rezultate pozitive”.
“Qindra mijëra civilë në Gaza nuk mund të presin më”, tha ambasadori Sergio Franca Danese.
