Dhjetëra shkolla dhe institucione publike anembanë Lituanisë kanë raportuar kërcënime me bomba të mërkurën në mëngjes, duke shënuar kështu herën e tretë të incidenteve të tilla në muajt e fundit.
Zëdhënësi i Departamentit të Policisë, Ramūnas Matonis, tha se kërcënimet ishin “jo vetëm shkolla, por edhe institucione të tjera të ndryshme”.
Mesazhet kërcënuese u morën gjatë natës, duke treguar një kohë të caktuar për shpërthimin e eksplozivit, shkruajnë mediat e huaja.
“Informacionet fillestare sugjerojnë se kryesisht shkollat dhe gjimnazet kanë marrë disa qindra emaile në gjuhën ruse”, thuhet në Departamentin e Policisë.
Kjo rritje e kërcënimeve për bomba po trajtohet si një “sulm informacioni” nga Qendra Kombëtare e Menaxhimit të Krizave.
Matonis u kërkoi institucioneve të mos ndalojnë operacionet e tyre nëse nuk identifikojnë një objekt të dyshimtë ose shenja të tjera që sugjerojnë një kërcënim të besueshëm.
