Aktivistja për klimën, Greta Thunberg është liruar nga akuzat për çrregullim publik lidhur me protestën e saj jashtë një hoteli që organizonte një konferencë për naftë dhe gaz vitin e kaluar, pasi një gjykatë në Londër hodhi poshtë çështjen.
Thunberg, e cila u bë një aktiviste e shquar në botë pas organizimit të protestave me javë të tëra jashtë Parlamentit të Suedisë në vitin 2018, u lirua në Gjykatën e Magjistraturës së Westminsterit nga një akuzë sipas Aktit të Rendit Publik.
Ajo ishte një nga dhjetëra personat e arrestuar në tetor jashtë një hoteli në Londër, ku Forumi i Inteligjencës së Energjisë priti drejtues të industrisë së naftës dhe gazit.
Thunberg dhe katër persona të tjerë, nga mosha 19 deri në 59-vjeç, u akuzuan se nuk respektuan urdhrat e policisë për të zhvendosur protestën e tyre në një vend të caktuar pranë konferencës.
Gjykatësi John Law vendosi se kushti i vendosur ndaj protestuesve ishte i paligjshëm pasi policia mund të kishte vendosur më pak kufizime dhe sepse kushtet nuk ishin të qarta.
