Shtëpia e Bardhë po përpiqet të marrë më shumë informacion mbi një balerinë me shtetësi të dyfishtë ruso-amerikane të arrestuar nga policia sekrete e Vladimir Putinit me akuza për tradhti dhe po paralajmëron çdo shtetas amerikan në Rusi që të largohet menjëherë nga vendi.
Videoja e postuar nga një agjenci ruse e lajmeve tregon 32-vjeçaren Ksenia Karelina duke u futur në një sallë gjyqi me pranga me fytyrën e mbuluar në mënyrë digjitale. Nuk është e qartë se kur është regjistruar video.
“Po përpiqemi të marrim më shumë informacione dhe të sigurojmë një qasje konsullore për atë individ”, tha zëdhënësi i Shtëpisë së Bardhë John Kirby të martën në një konferencë, raporton DailyMail.
Ai gjithashtu paralajmëroi çdo shtetas amerikan, përfshirë ata me shtetësi të dyfishtë ruse, që të largohen menjëherë nga vendi.
“Dua të përsëris paralajmërimet tona shumë të forta në lidhje me rrezikun që paraqet për qytetarët amerikanë brenda Rusisë. Pra, nëse jeni një shtetas amerikan, duke përfshirë shtetas të dyfishtë që banon ose udhëton në Rusi, duhet të largoheni menjëherë”.
“Natyrisht është e vetëkuptueshme nëse jeni shtetas amerikan ose keni një pasaportë amerikane dhe nuk keni udhëtuar në Rusi, por po mendoni të shkoni, padyshim që ju kërkoj të mos e bëni këtë”, shtoi ai.
Karelina është banore e Los Anxhelosit, e cila u bë shtetase amerikane në vitin 2021.
Në janar, ajo u arrestua në të njëjtën ditë kur Putini u ul për intervistën e tij me Tucker Carlson. Arrestimi ndodhi jashtë një kinemaje në Yekaterinburg. Akuzat fillestare kishin të bënin me sharje.
Yekaterinburg, qyteti më i madh në rajonin e Uralit, është gjithashtu vendi ku gazetari i Wall Street Journal Evan Gershkovich u arrestua me akuza për spiunazh gati 12 muaj më parë.
Zyrtarët konfirmuan të martën se ajo u arrestua nga Shërbimi Federal i Sigurisë i Putinit, FSB.
Karelina u dënua me 14 ditë paraburgim për “huliganizëm të vogël” para se të akuzohej për tradhti.
Balerina akuzohet për mbledhje fondesh për një kauzë ushtarake ukrainase. Ajo akuzohet posaçërisht për transferimin e 51.80 dollarëve nga llogaria bankare amerikane në një bamirësi ukrainase me bazë në Nju Jork, Razom, në ditën kur Putini pushtoi Ukrainën në 2022.
Akuzat për tradhti mund të sjellin dënime deri në 20 vjet burg.
Që nga viti 2023, 63 persona janë akuzuar për tradhti në Rusi, 37 janë shpallur fajtorë.
