Vijojnë hetimet për vrasjen e producentit shqiptar Flamur Beqiri, 36 vjeç i njohur si Alex, me breshëri plumbash në derën e shtëpisë më 24 dhjetor të 2019 në Londër. Viktima sipas BBC ishte pjesë e “krimit të organizuar”. Prokurorët pretendojnë se vrasja e Beqirit erdhi si pasojë e përshkallëzimit të dhunës midis dy grupeve rivale nga Suedia.
Bashkëshortja e tij, Debora Krasniqi, e ka mohuar një pretendim të tillë. Hetuesit thanë në gjykatën e Southwark Croën se ai ishte pjesë e një rrjeti të krimit të organizuar i përfshirë në “rivalitet të dhunshëm” me një grup tjetër. Babai i dy fëmijëve dyshohet se merrej me “tregti ndërkombëtare të drogës” që nga viti 2007 dhe ishte arrestuar në “disa herë në Evropë”.
Gjykata dëgjoi mikun e tij të ngushtë Naief Adawi, 37 vjeç, i cili jetonte aty pranë në Londër dhe u burgos për tetë vjet në Danimarkë në vitin 2010 për grabitje të rëndë me një armë. Ai u përshkrua para drejtësisë si “një nga krimet më të mëdha” në historinë e vendit.
Adawi u shënjestrua nga persona të armatosur jashtë shtëpisë së tij në 2019 ndërsa mbante në dorë vajzën e tij të porsalindur, të cilën e la duke ikur. Ai dhe vajza mbijetuan, por partnerja e tij Karolin Hakim, u qëllua disa herë dhe u vra.
Adawi së fundmi është arrestuar dhe akuzuar, së bashku me 15 persona të tjerë, për vepra penale duke përfshirë tentativë vrasje, përgatitje për të kryer vrasje, nxitje për të kryer vrasje dhe mbajtje pa leje të armëve.
Gruaja e Beqirit, Debora Krasniqi, më herët e ka mohuar akuzën se burri i saj ishte kriminel, duke u thënë se ai ishte i përfshirë në biznesin e muzikës.
Autori i dyshuar Anis Hemissi, 24 vjeç, raportohet se ishte maskuar duke vëzhguar shënjestrën para vrasjes.
Hemissi, i cili fluturoi në Londër më 20 dhjetor dhe u largua nga vendi për në Kopenhagë, Danimarkë, në orët e para të ditës së Krishtlindjes, dyshohet se ishte pjesë e një ekipi prej katër vrasësish nga Suedia.
Ata dyshohet se kanë planifikuar vrasjen e Beqirit për rreth gjashtë muaj. 24 vjeçari e mohon vrasjen. Shtetasit suedezë Estevan Pino-Munizaga, 35 vjeç, Tobias Fredrik Andersson, 32 vjeç dhe Baëer Karaer, 23 vjeç, të cilët dyshohet se janë dërguar për të ndihmuar Hemisin, gjithashtu e mohojnë vrasjen. Gjyqi vazhdon.
Flamuri i njohur si Alex Beqiri i lindur në Ferizaj, në Londër po jetonte që një kohë dhe po punonte si producent i disa artistëve të njohur në Angli. Për vrasjen e këtij personi kanë shkruar edhe mediat angleze. Sipas The Guardian, në mbrëmjen e 24 dhjetorit, natën e Krishtlindjes, rreth orës 21:00 të mbrëmjes, fqinjët raportuan në polici për disa të shtëna me armë zjarri. Ekipet e emergjencës shkuan në vendin e ngjarjes ku konfirmuan vdekjen e Flamur Beqirit i njohur si Alex.
