Hetimet për vrasjen e 34-vjeçarit shqiptar në Itali vijojnë, e ndërsa kërkohet të zbulohet autori, janë zbardhur dhe pistat e para.
Pasditen e djeshme (e shtunë, 4 Nëntor), rreth orës 16.30, Klaudio Myrtaj, 34 vjeç, u gjet i shtrirë, në gjendje të rëndë, dhe menjëherë u transportua në spitalin e Cuneos ku ndërroi jetë pak kohë më pas.
Krimi, deri më tani, nga hetimet italiane, lidhet me një motiv xhelozie.
I riu me origjinë shqiptare ishte banues në zonën e Caraglio. I mbërritur në Itali rreth dy vjet më parë, Klaudio Myrtaj ishte punëtor në kantieret e rrugëve, ndërsa bashkëpunonte herë pas here edhe me një zejtar vendas.
Efektivët po kryejnë hetimet pasi Myrtaj u gjet i shtrirë në tokë në një punishte zdrukthari në rrugën ‘Umberto I’, pranë bashkisë së qytetit në luginën Vermenagna.
Sipas hetimeve fillestare, tridhjetë e katër vjeçari është goditur me armë zjarri në kokë.
Drejtuesi i laboratorit deklaroi se pasditen e djeshme ka shkuar për të marrë benzinë me traktorin e tij dhe kur është kthyer në oborr, ka qenë një klient që ka gjetur shqiptarin duke vdekur dhe ka ngritur alarmin
Policia po dëgjon në cilësinë e dëshmitarëve disa persona, mes të cilëve edhe e dashura e tridhjetë e katër vjeçarit, si dhe drejtuesja e punishtes së zdruktharisë.
Dje askush nuk i ka dëgjuar të shtënat dhe për këtë arsye hipoteza është se vrasësi ka përdorur silenciator. Dyshimet janë edhe për një vrasje me paramendim.
Në fshatin ku Klaudio ishte shpërngulur disa muaj më parë dhe jetonte në një shtëpi jo shumë larg vendit të krimit, mbahet mend si një punëtor i palodhur, gjithmonë i buzëqeshur dhe që i përshëndeste të gjithë.
