Policia ka sekuestruar një sasi prej 6.5 kg kokainë në Portin e Durrësit, e cila është gjetur e fshehur në kontejnerë me banane.
Droga rezulton se është gjetur në kontejnerët e kompanisë “Alba Exotic Fruit”, në kontejnerët e të cilës më 13 korrik u gjet një sasi prej 11.6 kg kokainë.
Katër ditë pas zbulimit të ngarkesës së parë të drogës, policia thotë se u konstatuan të hapur dy kapakë të njërit prej kontejnerëve për llogari të firmës “Alba Exotic Fruit”.
Ndërsa nga kontrolli i ushtruar gjatë ditës së premte, 23 korrik, në 10 kontejnerë të saj u gjetën dhe u sekuestruan 6.5 kilogramë lëndë narkotike e dyshuar kokainë.
Operacioni drejtohet nga një grup i posaçëm prokurorësh të Prokurorisë së Rrethit Gjyqësor Durrës dhe të SPAK-ut.
Deri tani, policia ka arrestuar menaxherin e firmës, Barjon Gumeni si dhe ka shpallur në kërkim administratorin e “Alba Exotic Fruit”, Eduart Dauti.
