64 familje të një pallati në lagjen 12 në Durrës ende presin nisjen e punimeve për riparimin e dëmeve të tërmetit të 26 nëntorit të vitit 2019. Në protestën e radhës para bashkisë, përfaqësuesit e familjeve të pallatit në Durrës shprehen se kanë 4 vite që presin.
Gazetarja Klodjana Haxhiaj raporton për BalkanWeb se edhe pse për pak ditë mbushen 4 vjet nga tërmeti i vitit 2019, në pallatin nr 15 puna nuk nisur akoma. Banorët të shqetësuar shprehen se nuk dinë se çfarë të bëjnë në këtë pikë që kanë ardhur gjërat, pasi prej 6 muajsh nuk marrin as bonusin e qirasë.
Banorët kanë shkuar shume herë në bashki, kanë bërë edhe protesta të shumta për problemin e tyre, por ajo që iu është thënë është se për pallatin tuaj do të kërkohet fond i veçantë nga Ministria e Financave.
Pallati ka pësuar dëmtime të shumta të 3 katet e para, ndërkohë që gjatë kësaj periudhe apartamentet janë vjedhur rregullisht nga hajdutët.
