Arben Mustafa, “ministër i Financave”, në hije i Partisë Demokratike të Kosovës (PDK), ka thënë se buxheti në Kosovë çdo vit ka qenë më i lartë krahasuar me vitin paraprak.
Qeveria e Kosovës e ka prezantuar projektligjin e buxhetit që nënkupton që kuleta e shtetit për vitin 2023 do të ketë 3 miliardë e 212 milionë euro
Por deklaratat e Qeverisë, Mustafa i quan si boshe.
“Deklaratat se buxheti i vitit 2023 është buxheti më i lartë që ka pasur ndonjëherë Kosova është deklaratë boshe dhe nuk paraqet ndonjë të arritur të veçantë, sepse buxheti i Kosovës çdo vit ka qenë më i lartë në krahasim me vitet paraprake”, ka thënë Mustafa.
Ai po ashtu e ka përmendur edhe inflacionin që ka ndikuar në rritjen e vëllimit të parasë.
“Ky rezultat bëhet edhe më pak i rëndësishëm kur kemi parasysh se rritja e planifikuar e të hyrave buxhetore vjen kryesisht nga rritja e ndjeshme e çmimeve, përderisa sipas Fondit Monetar Ndërkombëtar, rritja reale e ekonomisë për vitin 2023 nuk pritet të jetë më e lartë se 3.5%”, ka thënë ai.
