Pothuajse 70 mjekë e infermierë, të cilët morën pjesë në një ndejë të madhe për Kërshëndella në jug të Spanjës, kanë dalë pozitiv në testin për Covid-19, thonë autoritetet.
Shumica e 68 të infektuarve janë mjekë e infermierë që punojnë në repartin e kujdesit intensiv në spitalin rajonal të Malagas, shkruan BBC.
Autoritetet shëndetësorë thonë se të gjithë të infektuarit ishin të pranishëm në një ndejë me rreth 170 persona, të mbajtur të mërkurën e kaluar.
Të gjithë mysafirët patën teste negative me antigjen para ndejës, por më shumë se gjysma e tyre tashmë janë izoluar.
Stafi i infektuar ishte plotësisht i vaksinuar dhe të prekurit nuk janë duke shfaqur simptoma, thanë autoritetet shëndetësore.
Raportimet lokale thonë se mjekë dhe infermierë nga njësi tjera të spitalit rajonal kanë marrë ndryshime detyrash për ta mbuluar mungesën e kolegëve.
Përhapja e virusit në këtë grup e ka rritur shqetësimin për rrezikun e përhapjes së koronavirusit në tubime sociale gjatë periudhës së Kërshëndellave. Për t’i ikur këtij rreziku, autoritetet shëndetësore në rajonin e Andaluzisë e kanë këshilluar stafin e spitaleve që të mos marrin pjesë në ndejat e Kërshëndellave.
