Më herët dëgjuam nga një negociator rus se nuk ishte bërë asnjë përparim në bisedimet Rusi-Ukrainë - tani ministri i Jashtëm i Ukrainës i ka bërë jehonë kësaj, duke nënvizuar në një deklaratë se ende nuk ka konsensus me Moskën për çështjet kryesore, shkruan BBC, transmeton Bota sot.
Dmytro Kuleba tha gjithashtu se ukrainishtja do të mbetet gjuha e vetme shtetërore e vendit. Rusia ka kërkuar mbrojtje për gjuhën ruse në Ukrainë. Një pakicë e konsiderueshme e ukrainasve përdorin rusishten si gjuhë të tyre të parë.
Kuleba tha se Ukraina nuk ka ndërmend të heqë dorë nga kërkesat e saj.
"Ne insistojmë, para së gjithash, për një armëpushim, garanci sigurie dhe integritet territorial të Ukrainës," tha ai.
Më herët, presidenti turk Rexhep Tajip Erdogan tha se negociatorët ukrainas dhe rusë kishin rënë dakord për katër nga gjashtë çështjet kryesore që po diskutoheshin gjatë bisedimeve të paqes, por se mosmarrëveshjet territoriale në rajonin lindor të Donbasit dhe gadishullin e Krimesë mbeten.
