Australia zbuloi sanksione të reja ndaj 67 zyrtarëve rusë të enjten, duke e çuar numrin e përgjithshëm të "individëve dhe subjekteve" të sanksionuar që nga pushtimi rus i Ukrainës "afër 600", sipas Ministrisë së Punëve të Jashtme.
Sanksionet e fundit synojnë biznesmenë të shquar rusë, si dhe zyrtarë të lartë ushtarakë dhe qeveritarë, duke përfshirë zëvendëskryeministrin Dmitry Grigorenko, Ministrin e Ekonomisë Maxim Reshetnikov dhe politikanin e lartë rus Alexander Babakov, raporton BBC, transmeton Bota sot.
Midis atyre në listat e fundit është gjeneral-koloneli Mikhail Mizintsev, i quajtur përgjegjës për sulmet ndaj "civilëve të pafajshëm", duke përfshirë "bombardimin e teatrit" në Mariupol.
"Ky raund i fundit i sanksioneve pason shfaqjen e provave të krimeve të luftës të kryera nga Rusia në Bucha dhe qytete të tjera përreth Kievit," thuhet në deklaratë.
"Tmerri është pothuajse i papërshkrueshëm dhe ne e shohim atë çdo ditë. Por unë mendoj se australianët mund të jenë krenarë për përpjekjet që vendi ynë po bën për të mbështetur Ukrainën," tha Ministrja e Jashtme Marise Payne për radiostacionin lokal 2GB.
