Deputeti rus Evgeniy Popov, shpërtheu i tërbuar ndaj prezantuesit të radios Tom Swarbrick, i cili ka qeshur me pretendimet e tij se Moska as nuk e ka bombarduar Kievin dhe as nuk ka shënjestruar civilët që nga pushtimi i Ukrainës.
Deputeti rus hodhi poshtë pretendimet se forcat e vendit të tij ishin përgjegjëse për vdekjen dhe plagosjen e qindra ukrainasve të kapur nga granatimet e rënda që nga fillimi i të ashtuquajturave "operacione speciale ushtarake".
Dëshmi të konsiderueshme të sulmeve ndaj civilëve janë shfaqur që nga 24 shkurti, me raporte për ukrainas që janë vrarë pa dallim nga forcat pushtuese ruse që tani po hetohen. Por, Evgeniy Popov, pretendoi se Rusia nuk e ka bombarduar kurrë Ukrainën, duke shkaktuar të qeshura të pabesueshme te prezantuesi i LBC, Tom Swarbrick, përcjell Bota sot.
Prezantuesi i radios tha: "A keni menduar ndonjëherë nëse e keni gabim? A keni menduar ndonjëherë nëse e keni gabuar këtë, nëse historitë që tregohen në Rusi ju kanë mashtruar?”
"Që rusët po synojnë civilët, se ata janë përgjegjës për krimet e luftës në pjesë të Ukrainës? A keni menduar ndonjëherë se mund të gaboni?"
Popov tha shpejt: "Jo, jo, jo. Së pari, ne nuk po synojmë dhe nuk po bombardojmë civilët. Ne jemi një popull me ukrainasit, e dini?"
Derisa Swarbrick mund të dëgjohej dhe më vonë u pa duke qeshur me pretendimet e tij, deputeti rus pyeti: "Pse po qesh? Ndalo, ndalo, ndalo!"
Prezantuesi tha: "Sepse bombat ruse po bien dhe po vrasin njerëz".
Por Popov u përgjigj: "Më lejoni t'ju them diçka që mund t'ju bëjë përshtypje. Babai im, tani për tani, jeton në Ukrainë. Për momentin, ai është ukrainas dhe unë jam pjesërisht ukrainas. Pjesa ime e dytë është nga Osetia, të cilën ju me satelitët tuaj e keni bombarduar në vitin 2008. Pjesa ime e tretë është ruse.
Ne nuk do të pushtojmë Ukrainën, ne do ta çlirojmë atë nga nazistët dhe do të shpëtojmë njerëzit tanë. Ne do të shpëtojmë dhe mbrojmë qarkun tonë."/Botasot
