Autoritetet në kryeqytetin e Ukrainës kanë nisur mbylljen emergjente të sistemit të gjenerimit të energjisë pas rritjes së konsumit, tha sot administrata rajonale e Kievit.
Në një deklaratë, administrata tha se masa ishte e nevojshme për të shmangur aksidentet e mëdha me pajisjet e energjisë, shkruan Skynews.
Javën e kaluar, sulmet ruse në infrastrukturën energjetike i shtynë autoritetet ukrainase të njoftojnë përkeqësimin e ndërprerjeve të energjisë nëpër qytetet më të mëdha të vendit.
Kryetari i bashkisë së Kievit, Vitali Klitschko tha se rrjeti elektrik i qytetit po funksiononte në “modalitet emergjence” dhe shtoi se shpresonte se Ukrenergo – operatori i sistemit të transmetimit të energjisë elektrike të Ukrainës – do të gjente mënyra për të adresuar mungesën “në dy deri në tre javë”.
Në rajonin e Kharkiv, guvernatori Oleg Syniehubov tha se ndërprerjet e përditshme të energjisë elektrike prej një ore do të fillonin këtë javë.
Ndërsa zyrtarët anembanë vendit u bënin thirrje njerëzve të ruanin energjinë e tyre, presidenti ukrainas Volodymyr Zelenskyy tha se 30% e termocentraleve të Ukrainës ishin shkatërruar që kur Rusia nisi valën e parë të sulmeve të synuara në infrastrukturë më 10 tetor.
