Besueshmëria e Bashkimit Evropian është vënë në pikëpyetje në rastin e korrupsionit të dyshuar në Parlamentin Evropian, paralajmëroi sot ministrja e Jashtme gjermane, Annalena Baerbock.
Ajo bëri të ditur se ky, siç e quajti ajo, “incident i pabesueshëm”, duhet të zbardhet tërësisht me zbatimin e plotë të ligjit.
"Kjo ka të bëjë me besueshmërinë e Bashkimit Evropian, kështu që ka pasoja në fusha të ndryshme," u tha Baerbock gazetarëve pas mbërritjes në takimin ministror të BE-së në Bruksel.
Prokuroria belge ka paditur katër persona me dyshimin se kanë marrë para dhe dhurata për të ndikuar në vendimet e Parlamentit Evropian në favor të një shteti të Gjirit.
Në ndërkohë, Parlamenti Evropian njoftoi se kompetencat dhe detyrat e zëvendëspresidentes së Parlamentit Evropian, Eva Kaili, janë pezulluar.
Prokurorët kontrolluan 16 shtëpi në Bruksel më 9 dhjetor në kuadër të hetimeve dhe sekuestruan 600 mijë euro. Që atëherë, katër persona janë akuzuar, dy janë liruar, njoftuan prokurorët më 11 dhjetor, pa i përmendur ata persona.
