Ish-mbreti i Greqisë, Konstandini II ka vdekur në moshën 82-vjeçare.
I lindur më 2 qershor 1940 në Athinë, ai hipi në fron më 6 mars 1964, në moshën 24-vjeçare, duke pasuar të atin, Pavlin I, pas vdekjes së tij.
Në shtator të po atij viti u martua me princeshën e atëhershme të Danimarkës, Anna Maria, me të cilën pati tre djem dhe dy vajza, shkruan ANA.
Mbretërimi i tij u dëmtua nga paqëndrueshmëria politike, duke çuar në një grusht shteti ushtarak më 21 prill 1967.
Pasi drejtoi një kundërgrusht shteti të dështuar kundër juntës së atëhershme ushtarake, ai u detyrua të largohej nga vendi, përcjell ATSh.
Ai qëndroi në Romë derisa junta shfuqizoi monarkinë në 1973.
Në një referendum të thirrur nga një qeveri e unitetit kombëtar të udhëhequr nga Konstantinos Karamanlis pas rënies së juntës në 1974, grekët e refuzuan përsëri monarkinë dhe i hoqën atij shtetësinë.
Në vitin 2002, pas apelimit në Gjykatën Evropiane të Drejtësisë, atij iu dhanë 13,7 milionë euro dëmshpërblim për pronën e tij të mëparshme në Greqi, e cila përfshinte pasurinë e pallatit ”Tati” dhe një vilë në Korfuz.
