LIVE: Zelesnky dhe Putin do të takohen - Rusia arreston një ish-punonjës të Ambasadës së SHBA-së

Një komplot rus për të rrëzuar qeverinë pro-perëndimore të Moldavisë u orkestrua nga ish-shefi i policisë speciale moldave Gheorghe Cavcaliuc. Ai i ka lëvizuar “fijet” që nga shtëpia e tij në Londër, zbulon një dokument i dorëzuar në Ministrinë e Jashtme Britanike nga një grup avokatësh moldavë dhe britanikë.

Raporti, i parë nga British Times, tregon se Cavcaliuc orkestroi një plan për të destabilizuar Moldavinë duke përdorur agjentë të huaj për të kryer një grusht shteti nën pretekstin e protestave antiqeveritare. Cavcaliuc dyshohet se ishte një lojtar kyç në organizimin e planit.

"Ai përdori lidhjet e tij të kaluara për të rekrutuar ish-oficerë policie në një grup paraushtarak që 'mbron' demonstratat e rreme antiqeveritare. Këto demonstrata janë të koordinuara me Moskën; ne e dimë këtë nga raportet tona të inteligjencës, nga inteligjenca amerikane dhe nga mënyra se si i portretizon propaganda ruse si opozitë," i tha The Times Radu Marian.

Cavcaliuc u largua nga Moldavia për në Mbretërinë e Bashkuar në vitin 2020, kur politikania pro-perëndimore Maia Sandu mundi presidentin pro-rus Igor Dodon në zgjedhjet presidenciale. Që kur Sandu erdhi në pushtet, presidenti rus Vladimir Putin është përpjekur me të gjitha forcat për të rrëzuar qeverinë e saj. 

Përveç anulimit të një dekreti të vitit 2012 që mbështeti pjesërisht sovranitetin moldav në zgjidhjen e së ardhmes së Transnistrisë, Putini po përpiqet në mënyrë aktive të ndalojë ndikimin në rritje të NATO-s në Moldavi. Qeveria moldave ka kërkuar vazhdimisht ekstradimin e Gheorghe Cavcaliuc, një ish oficer policie i akuzuar gjithashtu për grumbullim të paligjshëm të pasurisë mbi të ardhurat e tij zyrtare.

Thashethemet janë të shumta për gjendjen shëndetësore të liderit të Bjellorusisë, Aleskandër Lukashenko, tha në Twitter rivalja e tij kryesore, e cila ndodhet në mërgim, Svetlana Tikhanovskaya. Lukashenko nuk është shfaqur në publik që prej 8 majit, madje as nuk ka marrë pjesë dje në një ceremoni në kryeqytetin e vendit, duke ndezur spekulime se lideri është i sëmurë rëndë.

Siç raporton gazeta britanike Guardian, kryeministri i vendit Roman Golovchenko lexoi një mesazh nga Lukashenko gjatë një ceremonie vjetore në të cilën të rinjtë zotohen për besnikëri ndaj flamurit të ish-shtetit Sovjetik. Shumë gazetarë rusë raportuan se Lukashenko dukej i lodhur kur udhëtoi për në Moskë më 8 maj për përkujtimin vjetor të humbjes së Gjermanisë naziste në 1945. Ai gjithashtu nuk mori pjesë në një drekë të organizuar nga Putini dhe nuk iu drejtua veteranëve bjellorusë më 8 maj në Minsk, duke thyer traditën.

Sipas agjencisë opozitare të lajmeve "Euroradio", Lukashenko u transferua në një klinikë në Minsk të shtunën. Publikimi rus online Podyom citoi një anëtar të lartë të Dhomës së Ulët (Duma), Konstantin Zatulin, të ketë thënë se Lukashenko "thjesht u sëmur... dhe ndoshta ka nevojë për pushim".

Gazeta ruse "Kommersant" gjithashtu publikoi një artikull për shëndetin e Lukashenkos, duke cituar Zatulin dhe mediat opozitare bjelloruse. 

I pyetur për gjendjen shëndetësore të presidentit 68-vjeçar të Bjellorusisë, i cili ka udhëhequr vendin që nga viti 1994, zëdhënësi i Kremlinit Dmitry Peskov u kërkoi gazetarëve të hënën që "të besojnë vetëm informacionin zyrtar".

"Megjithatë, nuk ka asnjë informacion nga Minsk për këtë çështje,"- tha ai.

Lukashenko, zëdhënësi i Putinit, sundon vendin e tij me një grusht të hekurt. Pas protestave masive për rizgjedhjen e tij në vitin 2020, që besohej se ishte rezultat i mashtrimit elektoral, regjimi i tij shkaktoi një goditje të paprecedentë që vazhdon edhe sot e kësaj dite. Në të njëjtën kohë, ndërsa marrëdhëniet e tij me Evropën ishin të tensionuara, ai gjeti mbështetje te miku i tij, i forti i Kremlinit, Vladimir Putin, duke mbështetur sulmin ndaj Ukrainës që nga fillimi i tij në shkurt 2022.

Që nga hyrja në Kremlin si lider i Rusisë në vitin 1999, armiqtë, dhe figura misterioze janë përpjekur t'i marrin jetën diktatorit rus, Vladimir Putin. Sulmi me dron, javën e kaluar në Sheshin e Kuq, shkaktoi tronditje në mbarë botën dhe në Rusi: si mundën dy drone me telekomandë të hynin në një nga qytetet më të fortifikuara në botë? Menjëherë pas kësaj, Rusia pretendoi se dronët ishin pronë e Ukrainës dhe se forcat e Presidentit Volodymyr Zelensky po përpiqeshin të vrisnin Vladimir Putin. Më vonë ia hodhi fajin SHBA-së. Një javë më vonë, përgjigjet ende nuk janë të qarta. Ajo që ne dimë është se Putini është aktualisht një nga njerëzit 'më të kërkuar' në botë, një urdhër i ICC. Rreth pesë tentativa për vrasjen e Putinit janë regjistruar që nga fundi i shekullit. Ndaj, Express UK, ka bërë një përmbledhje tëmomenteve që mund të kishin ndryshuar historinë.

Hakmarrje kundër Putin

Në vitin 2002, Putin kreu një vizitë shtetërore në Azerbajxhan, një vend i cili pak më shumë se një dekadë më parë kishte qenë pjesë e Bashkimit Sovjetik. Presidenti i sapozgjedhur nuk e dinte se një grup burrash irakianë po komplotonin për ta vrarë. Një burrë dhe bashkëpunëtori i tij u arrestuan pasi plani për të hedhur eksploziv pranë Putinit u zbulua. Të dy u dënuan me dhjetë vjet burg dhe identiteti i tyre nuk u zbulua kurrë. Thuhet se ata kanë pasur lidhje me grupe në Afganistan dhe Çeçeni, që ka patur një marrëdhënie të ndërlikuar me Rusinë për shkak të luftërave.

“Rivali” politik

Përpjekja numër dy erdhi vetëm një muaj më pas. Në nëntor 2002, një burrë foli me rojet e sigurisë në Kremlin. Ai u tha atyre: "Unë quhem Ivan Zaitsev. Unë jam presidenti i Rusisë. Tani më çoni te Vladimir Putin!" Ai u dërgua në spital për gjendjen e tij mendore dhe më vonë doli. Por, njeriu misterioz thuhet se ka pasur gisht në një atentat që u zbulua më pas. Putini po udhëtonte në një autostradë të Moskës. Përgjatë rrugës, u gjetën 40 kg eksploziv. Ekipi i shpërthimit mbërriti dhe zbërtheu pajisjet. Putin jetoi edhe këtë herë.

Komploti në Britani

Në tetor 2003, policia britanike anti-terror prishi një plan të hartuar nga dy ish-burra të KGB-së për të vrarë Putinin gjatë një vizite në MB. Alexander Litvinenko, vetë një ish-agjent i KGB-së, i cili besohet se u helmua nga regjimi i Putinit, paralajmëroi autoritetet e Mbretërisë së Bashkuar për përpjekjen pasi foli me një rus të paidentifikuar. Komploti i supozuar në të cilin Putini do të qëllohej për vdekje nga një snajper u zbulua nga Scotland Yard pas informacionit nga Litvinenko. Ai tha se kishte pasur biseda telefonike me burrin dhe ishte takuar me të në Leicester Square. Litvinenko pretendoi se ai tha se Putini duhej të "rrëzohej". Një nga ata i tha Litvinenko se separatistët çeçenë do të kryenin atentatin.

Atentat para zgjedhjeve

Në vitin 2013, Adam Osmayev, një çeçen, u arrestua dhe u akuzua për një komplot të dyshuar për të vrarë Putinin në një sulm në autokolonën e tij. Ndërsa Gjykata Evropiane e të Drejtave të Njeriut ndaloi ekstradimin e tij në Rusi, ai u burgos në Ukrainë për dy vjet për posedim të eksplozivëve të paligjshëm.

Osmayev dhe gruaja e tij Amina Okuyeva ishin anëtarë të një batalioni vullnetar që luftoi kundër separatistëve pro-rusë në Ukrainën lindore. Në vitin 2017, dyshes iu zu pritë teksa po udhëtonin pranë Kievit, kryeqytetit të Ukrainës. Zonja Okuyeva u qëllua për vdekje ndërsa z. Osmayev u plagos. Autori më vonë u identifikua si një rus me origjinë çeçene.

"Qëllimi ishte të shkonim në Moskë dhe të përpiqeshim të vrisnim kryeministrin Putin... Afati ynë ishte pas zgjedhjeve presidenciale ruse", tha ai.

Eksploziv në makinë

Në shtator të vitit 2022, Putin ishte viktimë e një tjetër atentati të dyshuar pasi limuzina e tij nxorri tym kudo. Presidenti rus, megjithatë, shpëtoi i sigurt. Kanali Telegram General SVR, i cili pretendon se është në pronësi të një personi të brendshëm në Kremlin dhe shpesh zbulon detaje rreth jetës në zemër të politikës ruse, tha se Presidenti po kthehej në rezidencën e tij në një autokolonë. Ai mbrohej nga pesë makina të blinduara, me Putinin në të tretën, transmetoi General SVR.

Presidenti rus Vladimir Putin ka nënshkruar një dekret që lehtëson procesin e marrjes së nënshtetësisë ruse për shtetasit e huaj që kanë nënshkruar kontrata shërbimi ushtarak me Forcat e Armatosura Ruse që nga fillimi i luftës. Sipas dekretit të publikuar në faqen zyrtare, ata që kanë nënshkruar për një periudhë njëvjeçare mund të aplikojnë për shtetësi me procedurë të thjeshtuar. 

Ky dekret i ri ndryshon dekretin e mëparshëm të lëshuar nga Putin shtatorin e kaluar, i cili kërkonte që të huajt të shërbenin për të paktën një vit dhe të përfshiheshin aktivisht në luftime për të paktën gjashtë muaj për t'u kualifikuar për një procedurë të thjeshtuar të shtetësisë, shkruan CNN.

Versioni i ri i dekretit nuk nënkupton pjesëmarrje të drejtpërdrejtë në armiqësi.

Lexo edhe: E papritur/ Lukashenko zbulon pa dashje këtë gjë për Rusinë - SHBA-të shohin indikacione mes Rusisë dhe Iranit!

Rregullat e përditësuara gjithashtu zgjerojnë të drejtën për shtetësi të thjeshtuar për anëtarët e familjes së personelit ushtarak.

Forca Kombëtare e Mbrojtjes së Afrikës së Jugut (SANDF) tha të hënën se shefi i saj, Lawrence Mbatha, ndodhet në Moskë për një takim dypalësh, ku do të vizitojë akademitë ushtarake ruse dhe do të zhvillojë bisedime me zyrtarë.

“Duhet të theksohet se Afrika e Jugut ka marrëdhënie dypalëshe ushtarake me vende të ndryshme në kontinent dhe më gjerë”, tha Ushtria e Afrikës së Jugut në një deklaratë, duke shtuar se takimi në Rusi ishte planifikuar shumë kohë më parë.

Më herët të hënën, presidenti i Afrikës së Jugut Cyril Ramaphosa tha se pozicioni si një vend paangazhuar nuk favorizon Rusinë ndaj shteteve të tjera dhe përsëriti thirrjen e tij për një zgjidhje paqësore të konfliktit në Ukrainë.

Presidenti Ramaphosa i bëri komentet në një buletin javor presidencial. Javën e kaluar, Shtetet e Bashkuara thanë se një sasi armësh ishte ngarkuar në anijen ruse Lady R nga një bazë detare në Kejp Taun të Afrikës së Jugut në fund të vitit të kaluar, duke shkaktuar një përplasje diplomatike mes dy vendeve.

Zyrtarët e Afrikës së Jugut hodhën poshtë me shpejtësi pretendimet e bëra nga ambasadori amerikan në Afrikën e Jugut, Reuben Brigety, i cili gjithashtu tha se zyrtarët e lartë amerikanë kishin "shqetësime të thella" mbi politikën e pretenduar të neutralitetit të Afrikës së Jugut mbi luftën e Rusisë në Ukrainë.

"Ne nuk kundërshtojmë pretendimet se pozicioni ynë si një vend i paangazhuar favorizon Rusinë mbi vendet e tjera. As nuk pranojmë pretendimet se ai rrezikon marrëdhëniet tona me vendet e tjera", tha presidenti Ramaphosa.

Afrika e Jugut do të vazhdojë të respektojë marrëveshjet dhe traktatet ndërkombëtare në të cilat është nënshkruese dhe qasja e saj ndaj pretendimeve të Shteteve të Bashkuara për dërgesë armësh do të trajtohet në frymën e marrëveshjeve në fuq, shtoi ai.

Zyra e zotit Ramaphosa ka thënë se nuk është ofruar asnjë provë konkrete për të mbështetur pretendimet e bëra nga ambasadori, por se një hetim i udhëhequr nga një ish-gjyqtar do ta shqyrtojë çështjen.

Disa ministra, duke përfshirë atë përgjegjës për kontrollin e armëve, një zëdhënës i ministrisë së jashtme dhe ministri i komunikimeve kanë thënë se Afrika e Jugut nuk kishte miratuar asnjë dërgesë armësh në Rusi në dhjetor.

Ambasadori Brigety u thirr të premten për të takuar Ministren e Jashtme të Afrikës së Jugut, Naledi Pandor dhe ai i kërkoi falje "pa rezerva" qeverisë dhe popullit të Afrikës së Jugut, thuhet në një deklaratë e ministrisë së jashtme të Afrikës së Jugut.

“Jam mirënjohës për mundësinë për të biseduar me ministren e Jashtme Pandor... dhe për korrigjuar çdo keqkuptim të komenteve të mia publike”, tha ambasadori Brigety në një postim në Twitter, në të cilin ai nuk e konfirmoi se kishte kërkuar falje për komentet e tij.

Afrika e Jugut, e cila ka abstenuar në votimet për rezolutat e OKB-së mbi luftën e Rusisë në Ukrainë, thotë se është e paanshme. Vendet perëndimore, megjithatë, e konsiderojnë Afrikën e Jugut si një nga aleatët më të ngushtë të Moskës në kontinentin afrikan.

Shtëpia e Bardhë tha të hënën se Rusia po kërkon të blejë dronë të avancuar nga Irani për t'i përdorur në luftën e saj kundër Ukrainës, pasi përdori shumicën e 400 dronëve që kishte blerë më parë nga Teherani.

Administrata e Presidentit Biden vitin e kaluar publikoi imazhet satelitore dhe gjetjet e shërbimeve të zbulimit që tha se tregonin se Irani i kishte shitur Rusisë qindra dronë. Dhe për muaj të tërë, zyrtarët kanë thënë se Shtetet e Bashkuara besonin se Irani po konsideronte t'i shiste qindra raketa balistike Rusisë, por Uashingtoni nuk kishte prova se për këtë ishte arritur një marrëveshje.

“Irani gjithashtu vazhdon t'i ofrojë Rusisë dronë ushtarakë. Që nga gushti, Irani i ka ofruar Rusisë më shumë se 400 dronë, kryesisht të llojit Shahed”, tha zëdhënësi i Këshillit të Sigurisë Kombëtare të Shtëpisë së Bardhë, John Kirby.

“Rusia ka shpenzuar shumicën e këtyre dronëve për të sulmuar infrastrukturën kritike të Ukrainës. Duke i ofruar Rusisë këta dronë, Irani ka ndihmuar drejtpërdrejt agresionin e Rusisë në Ukrainë”, u tha Kirby gazetarëve.

Dronët Shahed që Rusia tashmë i ka blerë janë të mbushur me eksplozivë dhe janë të programuar të fluturojnë lart derisa të arrijnë objektivin e tyre.

Zoti Kirby tha se rusët tani synojnë të blejnë dronë edhe më të avancuar dhe "shumë më vdekjeprurës".

Njoftimi i fundit është pjesë e publikimit të vazhdueshm të gjetjeve të agjencive të zbulimit nga administrata e Presidentit Biden për të detajuar atë që zyrtarët amerikanë thonë se është një partneritet i thelluar i mbrojtjes midis Rusisë dhe Iranit.

Zyrtarët amerikanë thonë se Irani i ka ofruar Rusisë gjithashtu armë artilerie dhe municion tankesh për luftën e saj kundër Ukrainës.

Ndërkohë, zyra e kryeministrit britanik Rishi Sunak njoftoi të hënën se po i dërgonte Ukrainës qindra raketa të tjera të mbrojtjes ajrore, si dhe "dronë me rreze të gjatë veprimi" që mund të arrijnë objektiva në një distancë prej më shumë se 200 kilometrash. Njoftimi erdhi pasi presidenti ukrainas Volodymyr Zelenskyy vizitoi Britaninë dhe i bëri thirrje pa sukses kryeministrit Sunak që Londra të furnizonte Ukrainën me avionë luftarakë ndërsa Kievi po përgatitet për një ofensivë pranverore për të rimarrë territoret e pushtuara nga Rusia./VOA

Rusia tha të dielën se dy nga komandantët e saj ushtarakë u vranë gjatë luftimeve pranë Bakhmutit.

Në një njoftim të rrallë për viktimat në fushën e betejës, Ministria ruse e Mbrojtjes tha se komandanti i brigadës së 4-të të motorizuar Vyacheslav Makarov dhe zëvendës komandanti i forcave tokësore Yevgeny Brovko u vranë në luftime.

Koloneli Makarov u vra ndërsa brigada e tij zmbrapsi sulmet e trupave ukrainase në jug të vendbanimit Krasna, sipas një deklarate nga Ministria ruse e Mbrojtjes.

“Dy sulme të armikut u zmbrapsën. Gjatë zmbrapsjes së sulmit të tretë, komandanti i brigadës u plagos rëndë dhe vdiq gjatë evakuimit nga fusha e betejës”, deklaruan zyrtarët rusë.

“Brovko u vra ndërsa trupat ruse zmbrapsën sulmet ukrainase”, tha ministria, duke shtuar se ai “vdiq heroikisht, duke pësuar plagë të shumta nga predha”.

Ditët e fundit, ushtria ukrainase është duke zhvilluar një kundërsulm të suksesshëm në qytetin e Bakhmutit, duke raportuar se ka vrarë qindra ushtarë rusë e zbrapsur qindra të tjerë. Raportohet se rreth 14 kilometra katror sipërfaqe në qytet janë çliruar.