Qeveria e Francës tha se do të shqyrtojë "të gjitha opsionet" për të rivendosur rendin në vend pas përshkallëzimit të protestave anembanë Francës, për shkak të vrasjes nga policia të një 17-vjeçari.
Protestat e të enjtes mbrëma ishin më të ashprat e zhvilluara deri më tani.
Sipas autoriteteve, më shumë se 200 policë mbetën të plagosur, ndërsa 875 persona u arrestuan gjatë natës, ndërsa protestuesit e organizuar në të gjitha qytetet e vendit, u përplasën me forcat policore.
Protesutesit i vunë flakën autobuzëve dhe automjeteve të tjera, vunë barrikada dhe shkatërruan dyqane.
Presidenti francez Emanuel Macron, i cili deri më tani ka përjashtuar shpalljen e gjendjes së jashtëzakonshme, u largua sot nga takimi i nivelit te lartë të Bashkimit Europian në Bruksel dhe u kthye në Paris për të marrë pjesë në mbledhjen e dytë të qeverisë për menaxhimin e krizës.
Kryeministrja Elisabeth Borne tha se qeveria do të shqyrtonte “çdo mundësi” për të kthyer qetësinë, duke i quajtur aktet e dhunës të papranueshme dhe të pajustifikueshme.
Ministri i Brendshëm Gerald Darmanin njoftoi se të enjten mbrëma në terren ishin më shumë se 40 mijë oficerë policie, 249 prej të cilëve u plagosën. Sipas tij, ishin sulmuar 79 stacione policore, 119 ndërtesa publike dhe 28 shkolla.
Të shtënat vdekjeprurëse nga policia ndaj 17-vjeçarit Nahel M, i cili ishte me origjinë marokene dhe algjeriane, kanë tronditur vendin dhe kanë rinxjerrë në pah ankesat për përdorimin e dhunës së tepruar dhe për racizëm sistematik nga punonjësit e policisë.
Oficeri i policisë i cili qëlloi ndaj adoleshentit po mbahet në paraburgim./VOA