Presidenti ukrainas, Volodymyr Zelensky pritet të marrë pjesë në një takim joformal në Greqi të organizuar nga kryeministri grek, Kyriakos Mitsotakis.
Ky i fundit sonte organizon një darkë joformale për liderët e vendeve të Ballkanit dhe më gjerë të rajonit, raportojnë mediat greke.
Në darkën e cila do të mbahet në hotelin “Britania e Madhe”, do të marrin pjesë Presidenti i Këshillit Evropian, Charles Michel dhe Presidentja e Komisionit Evropian, Ursula von der Leyen.
Në kanalet ukrainase po qarkullojnë lajme për mundësinë që presidenti ukrainas, i cili aktualisht ndodhet në një turne evropian, të vijë në Athinë.
Lideri ukrainas i lajmëron rrallë paraqitjet e tij, ndaj konsiderohet shumë e mundshme që të vijë në Athinë dhe të qëndrojë në hotelin qendror të qytetit.
Ndryshe, Kosovën në këtë takim do ta përfaqësojë kryeministri, Albin Kurti ndërsa nuk është ftuar kryeministri i Shqipërisë, Edi Rama.
