Që prej shumë kohësh, paranojat e presidentit rus Vladimir Putin, kanë qenë burim polemikash në Rusi dhe jo vetëm.
Së fundmi, thuhet se ai është bërë aq paranojak sa ka armatosur zhytës që kërkojnë vrasës të mundshëm në plazhet e tij private.
Përveç kësaj, ai qëllimisht u jep informacione të rreme truprojave të tij, pohon një ish-anëtar i rojes së sigurisë së presidentit rus, Vitalij Brizati.
"Kjo tregon se sa shumë ai ka frikë për jetën e tij," tha Brizati në një intervistë të fundit me stacionin e pavarur televiziv rus TV Rain, raportoi “The Telegraph”.
Brizati, i cili punoi për Shërbimin Federal të Mbrojtjes, por u largua nga Rusia për në Ekuador pasi Kremlini pushtoi Ukrainën, tha gjithashtu se Putini është aq i shqetësuar për vrasjen sa një nga truprojat e tij punon si operator lavatriçeje në pallatet në Krime të aneksuar nga Rusia.
Ish-zyrtari i sigurisë tha se ai ishte një shëtitës i qenve për FSO dhe ishte i vendosur në një nga pronat sekrete të Putinit në Krime. Brizati, i cili e quajti Pallatin e Krimesë një "vend fantazi" dhe një "mini-qytet", tha se Putin nuk u besonte plotësisht truprojave të tij dhe shpesh i gënjeu se si do të arrinte në Krime dhe ku do të qëndronte.
Njerëzve u thanë se “ai po pushon në vilë dhe të gjithë duhet të vrapojnë e të kujdesen për të, por se ai mund të jetë në një vend krejtësisht tjetër”, pohon Brizati.
Putini raportohet se përdor edhe testues të ushqimit pasi ka hyrë në paranojë se mos po helmohet dhe se ka punësuar një grup të njerëzve që i përdor si dublues.
Paranoja u theksua edhe më shumë kur Putini u sfidua nga kreu i mercenarëve të Wagnerit, Yevgeny Prigozhin, që tashmë ka vdekur.
