Autoritetet franceze kanë regjistruar rreth 1,100 akte antisemitike që nga sulmet e 7 tetorit të Hamasit ndaj Izraelit, tha të martën Ministri i Brendshëm francez, Gerald Darmanin, më shumë se trefishi i numrit të raportuar më parë në tetor.
Darmanin tha se Franca ishte dëshmitare e “një shpërthimi të akteve antisemitike” dhe se shifra e re përfaqëson “dyfishin e të gjitha akteve antisemitike në të gjithë vitin 2022”.
Sipas numrave të publikuar nga Shërbimi Francez i Mbrojtjes për Komunitetin Hebre, i cili punon me Ministrinë e Brendshme, në vitin 2022 ka pasur 436 akte antisemitike, raporton CNN.
Darmanin tha se autoritetet deri më tani kishin arrestuar 490 persona të lidhur me krimet. Rreth 120 prej tyre janë të huaj, tha ai.
“Rreth 15 janë në paraburgim administrativ në pritje të dëbimit të tyre, tre janë dëbuar tashmë dhe të tjerëve u është hequr leja e qëndrimit”, tha ministri në radion franceze Sud, pa specifikuar kombësitë.
Më 17 tetor, autoritetet franceze raportuan 327 akte antisemitike dhe 183 ndalime në lidhje me krimet që nga shpërthimi i armiqësive në Lindjen e Mesme.
