Me pagesat e njëhershme të ndihmës, rritjen e pensioneve dhe paraqitjet e palodhura në mediat shtetërore, presidenti serb Aleksandar Vuçiq po kërkon një tjetër fitore në zgjedhjet e së dielës duke u mbështetur kryesisht në bazën e tij rurale dhe të varfër.
Në mesin e tyre është edhe Jovanka Cvejiq, një pensioniste 81-vjeçare nga Beogradi, e cila ka kohë që po përpiqet t’ia dalë me pensionin e saj.
Ky vit ishte veçanërisht i vështirë për të, sepse inflacioni mesatar prej 12 për qind uli fuqinë e saj blerëse, kështu që një udhëtim në dyqan i ha pothuajse një të tretën e të ardhurave të saj
“Unë i besoj presidentit tim dhe besoj se do të arrij të mbijetoj”
Pavarësisht momenteve të vështira, mbështetja e saj për Vuçiqin përpara zgjedhjeve parlamentare dhe lokale të së dielës nuk ka ndryshuar.
“Unë i besoj presidentit tim dhe besoj se do të arrij të mbijetoj”, tha ajo për Agjencinë France Presse (AFP).
Në dekadën e fundit, Vuçiq është mbështetur shumë në vota të tilla për të konsoliduar kontrollin e tij mbi Serbinë.
Edhe pse ai është i përbuzur nga klasa e mesme urbane për shkak të kontrollit të tij autokratik në institucionet serbe, Vuçiq është ende i popullarizuar në mesin e votuesve të varfër dhe ruralë të vendit, të cilët e konsiderojnë atë një garantues të stabilitetit, sipas AFP.
Dhjetëra mijëra njerëz dolën në rrugët e qyteteve të mëdha në fillim të këtij viti në protesta të quajtura “Serbia kundër dhunës” pas masakrës në një shkollë fillore të Beogradit dhe vrasjeve në fshatrat përreth Mlladenovacit. Shpejt demonstratat u kthyen në mitingje antiqeveritare dhe zgjatën me muaj të tërë.
Koalicioni pro-evropian i partive opozitare “Serbia kundër dhunës” që doli nga ato protesta u bashkua me shpresën për të mposhtur Partinë Progresive Serbe (SNS) në pushtet të Vuçiqit në zgjedhje.
Zgjedhjet e parakohshme parlamentare, një praktikë e zakonshme e SNS-së në pushtet, u caktuan për 17 dhjetor. Në të njëjtën kohë, do të zgjidhen përfaqësues në Kuvendin e Vojvodinës dhe këshilltarë në 65 komuna dhe qytete, përfshirë Beogradin.
Edhe pse Vuçiq nuk do të jetë në fletëvotim në zgjedhjet e së dielës, ato janë një referendum për presidentin dhe partinë e tij në pushtet.
“Unë besoj se Serbia do të ndalojë së zhvilluari nëse presidenti ynë largohet,” tha Milica, një aktiviste e SNS, e cila nuk deshi të jepte mbiemrin e saj.
Sondazhet parazgjedhore tregojnë se SNS do të fitojë sërish dhe do të qëndrojë në pushtet.
“Një makineri mediatike që paraqet një vizion të gëzuar për të ardhmen e kombinuar me një qeveri që tund para për të rritur pensionet është diçka që sjell qartësisht sukses,” tha Vojislav Mihailoviq, një analist në Qendrën për Kërkim, Transparencë dhe Përgjegjësi (CRTA) me qendër në Beograd.
Shumë i vjetër dhe shumë i varfër
Duke qenë se mediat serbe janë kryesisht nën kontrollin e tij, Vuçiq e ka dorën të lirë për t’u dërguar vazhdimisht mesazhe votuesve për pagesat dhe rritjen e pensioneve.
Në tetor, pensionet u rritën me 5.5 për qind, ku qeveria premtoi se pas Vitit të Ri do të pasonte një tjetër rregullim. Rritja është një lehtësim i mirëpritur për pensionistët e varfër të cilët, mesatarisht, duhet të jetojnë me rreth 320 euro në muaj.
Çdo pensionist serb ka marrë gjithashtu një ndihmë të njëhershme prej rreth 20,000 dinarë (170 euro).
Megjithatë, qeveria nuk përkëdhel vetëm të moshuarit, sepse Vuçiq u premton të gjithë nxënësve të shkollave të mesme në Serbi – dhe janë 235,000 prej tyre – një pagesë një herë prej 10,000 dinarë (85 euro). Këto lëvizje do të ndjekin një program të ngjashëm në të cilin shteti u paguante prindërve me fëmijë nën 16 vjeç të njëjtën shumë dhe një fushatë që uli çmimet e mallrave të zgjedhur në dyqane.
Por do të duhet të paguhen shpenzime të mëdha, paralajmërojnë ekonomistët, kështu që Serbisë ndoshta do t’i duhet të marrë hua për të financuar ndihmën ndërsa lufton me inflacionin dhe rritjen e dobët ekonomike.
“Ne nuk i kemi ato para,” theksoi për AFP Danica Popoviq, një profesore e ekonomisë në pension në Beograd.
“Është blerja e votave dhe qëllimi është të kapë sa më shumë votues në rrjetën e partisë në pushtet,” shton ajo.
Por Vuçiq është jashtëzakonisht i popullarizuar në mesin e qytetarëve të moshuar, tha Mihailoviq, duke theksuar se ky grup mbetet baza e votimit për SNS-në e Vuçiqit.
“Unë shoh siguri dhe ndershmëri në Vuçiq”, tha Milomir Petroviq, një pensionist 76-vjeçar nga fshati Dljin. “Ka pasur kohë më të mira, por mbaj mend edhe më keq. Tani mund të jetoj mirë, normalisht”.
