Ministri i Jashtëm ukrainas, Dmytro Kuleba, ka deklaruar se ka pasur raste kur ai ndjeu nevojën për ta “goditur në fytyrë” rivalin e tij rus Sergei Lavrov në fazat e hershme të negociatave pas fillimit të pushtimit rus të Ukrainës.
Në një intervistë jozyrtare me një video bloger ukrainas që mbulonte një gamë të gjerë temash, nga gatimi te hobi dhe futbolli ukrainas, kur u pyet se cili ishte negocimi më i vështirë për të, Kuleba u përgjigj se ishte me Lavrovin.
“Bisedat më të vështira janë ato ku thjesht ndihesh sikur dëshiron të ngrihesh dhe të godasësh kundërshtarin në hundë, por në të vërtetë nuk mundesh. Dhe mund të them se ka ndodhur dy ose tre herë. Një rast ishte me Lavrovin në Antalia në pranverën e vitit 2022″, tha ai.
Sipas Reuters, negociatorët ukrainas dhe rusë u takuan në disa raunde bisedimesh në javët e para pas pushtimit të shkurtit 2022, fillimisht pranë kufirit të Ukrainës me Bjellorusinë dhe më vonë në Turqi.
Kuleba më pas tha se bisedimet në Turqi ishin të vështira, dhe se ato kishin të bënin me një armëpushim dhe rregullimin e korridoreve humanitare.
Në ato bisedime nuk është arritur asnjë marrëveshje dhe që atëherë nuk ka pasur negociata.
