LIVE: Putin i pamëshirshëm? SHBA bën paralajmërimin e fortë për Ukrainën; Trump i kundërpërgjigjet presidentit rus

NATO dhe Ukraina do të krijojnë një qendër të përbashkët analizimi, trajnimi, dhe edukimi në Poloni, ka njoftuar Sekretari i Përgjithshëm i NATO-s, Jens Stoltenberg, gjatë një konference për shtyp në Bruksel.

“Sot ne vendosëm të krijojmë një qendër të përbashkët analize, trajnimi, dhe edukimi NATO-Ukrainë në Bydgoszcz, Poloni”, tha Stoltenberg ndërsa ministrat e mbrojtjes së NATO-s u mblodhën në kryeqytetin e Belgjikës.

“Kjo do t’i lejojë Ukrainës të ndajë mësimet e nxjerra nga lufta e Rusisë dhe do të krijojë një strukturë që forcat ukrainase të mësojnë dhe të stërviten së bashku me homologët e tyre aleatë”, shtoi ai.

Sipas Stoltenberg, aleatët ende nuk kanë rënë dakord për detaje të mëtejshme në lidhje me planin, shkruan yahoonews.

“Ajo që kemi marrë tani është vendimi politik dhe pastaj do ta zbatojmë atë vendim në javët dhe muajt e ardhshëm. Vendimi i sotëm është fillimi i procesit”, tha sekretari.

Gjithashtu, Stoltenberg ka theksuar se ekspertët e NATO-s po punojnë mbi detajet dhe kornizën për t’u trajnuar me trupat aleate.

Ndryshe, vendet anëtare të NATO-s kanë ofruar mbështetje trajnimi për Forcat e Armatosura të Ukrainës që nga shpërthimi i luftës në shkallë të gjerë.

Gjatë samitit të NATO-s në Vilnius korrikun e kaluar, aleanca emëroi ndërveprim më të mirë midis ushtrisë së Ukrainës dhe ushtrive të vendeve anëtare NATO-s si një nga prioritetet kryesore për një bashkëpunim të ardhshëm.

“Rusia duhet të kishte filluar veprimet aktive në Ukrainë më herët, por për një kohë të gjatë u përpoq ta zgjidhte konfliktin në mënyrë paqësore dhe u mbështet në ndershmërinë e kundërshtarëve të saj”, tha presidenti rus Vladimir Putin në një intervistë të re, të cilën ia dha këtë herë gazetarit rus Pavel Zarubin.

Videoja e intervistës është publikuar në kanalin Telegram të Kremlinit. Pas intervistës me gazetarin amerikan Tucker Carlson, e cila shkaktoi interes të paparë dhe u ndoq nga qindra miliona njerëz në mbarë botën, Vladimir Putin, në një bisedë me Zarubina, foli për atë intervistë, luftën në Ukrainë, presidentin amerikan Joe Biden, por edhe se "Rusia së shpejti do të ketë një vaksinë kundër kancerit".

“E vetmja gjë për të cilën mund të pendohemi është që nuk filluam veprimet tona aktive më herët, duke besuar se kemi të bëjmë me njerëz të denjë”, tha Putin duke përshkruar situatën në Ukrainë, raportoi agjencia shtetërore ruse TASS. Putin tha se fushata zgjedhore në Shtetet e Bashkuara të Amerikës po merr vrull dhe po merr forma akute dhe se për Federatën Ruse, nga kandidatët e mundshëm për presidencën e SHBA-së, Joe Biden dhe Donald Trump, është më mirë për president të jetë Biden sepse ai është "më me përvojë dhe më i parashikueshëm”.

“Biden. Ai është një person më me përvojë. Ai është i parashikueshëm. Ai është një politikan i një formacioni të fortë”, tha Putin, siç raporton RIA Novosti.I pyetur për të komentuar gjendjen shëndetësore të Biden, ai tha se “nuk ka të drejtë të komentojë gjendjen shëndetësore të presidentit amerikan, pasi ai nuk është “mjek ”.Moska do të "bashkëpunojë me liderin të cilit i beson populli kushdo qoftë ai", konfirmoi ai gjithashtu.

Biden është politikan me përvojë dhe më i parashikueshëm, pasi ai është një politikan i shkollës së vjetër, deklaroi presidenti rus, Vladimir Putin. ”Por, ne do të punojmë me çdo lider amerikan, të zgjedhur nga populli i Amerikës”, shtoi ai.

Putin shtoi se një fitore për Joe Biden në zgjedhjet presidenciale në SHBA, që do të mbahen në nëntor, do të ishte rezultati më i mirë i mundshëm për Rusinë.

Në një intervistë për televizionin rus, pjesë të së cilës u publikuan nga Kremlini të mërkurën, Putin kritikoi qeverinë amerikane. ”Mendoj se qëndrimi i administratës aktuale është jashtëzakonisht i dëmshëm dhe i gabuar”, tha ai.

Dy fuqitë e mëdha bërthamore janë në mosmarrëveshje për pothuajse të gjitha çështjet ndërkombëtare, por mbi të gjitha për shkak të luftës ruse kundër Ukrainës.

”Megjithatë, një fitore e Bidenit do të ishte e parapëlqyeshme”, tha Putin. Komentet e Putinit janë në kundërshtim me politikën e Rusisë në vitet e fundit, e cila ka favorizuar Donald Trump. Ish-presidenti Donald Trump reagoi ndaj kësaj deklarate të presidentit rus, Vladimir Putin.

”Presidenti Putin sapo më bëri një kompliment të madh, në fakt”, tha Trump në një takim elektoral në Charleston. ”Ai thjesht tha se do të preferonte të kishte Joe Biden si president sesa Trump”, vazhdoi ai. ”Tani, ky është një kompliment. Shumë njerëz thanë sa keq! Jo, jo, kjo është një gjë e mirë. Dhe sigurisht, ai do ta thoshte këtë”, theksoi Trump.

Komenti i fundit i Trump ishte në përgjigje të komenteve të Putinit gjatë një interviste me një korrespondent të televizionit shtetëror rus, në të cilën ai thuhet se beson se rizgjedhja e Bidenit do të ishte një zgjedhje më e mirë për interesin e Rusisë – megjithëse ai shtoi se do të punojë me çdo lider të SHBA-së.

Në mitingun e Charlestonit, Trump tha se është e sigurt se Putini do të preferonte fitoren e Bidenit, sepse ai vetë pengoi interesat e Rusisë ndërsa ishte president, veçanërisht në ndërtimin e ”Nord Stream 2”, një gazsjellës i diskutueshëm gjermano-rus.

“Unë ndalova ‘Nord Stream 2’ dhe [Biden] e miratoi menjëherë pasi u largova, kështu që Putin nuk është një fans i imi në të vërtetë”, tha Trump, duke iu referuar rolit të tij si president në ndalimin e ndërtimit të gazsjellësit.

”Ai nuk dëshiron të më ketë mua. Ai do Biden sepse do t’i jepet gjithçka që dëshiron, duke përfshirë Ukrainën”, tha Trump për marrëdhëniet mes Putinit dhe Bidenit.

”Ai do të realizojë ëndrrën e tij për të marrë Ukrainën për shkak të Bidenit… I vetmi president në pesë të fundit që nuk i ka dhënë asgjë Rusisë është një president i njohur si Donald J. Trump”, përfundoi Trump.

Ukraina raportoi për luftime të ashpra në qytetin e Avdijivkës, që gjendet përgjatë frontit të luftës, përderisa një gjeneral ukrainas shtoi se janë përgatitur pozicione të reja përreth kësaj qendre industriale, në kohën kur Rusia po intensifikon sulmet.

Ky njoftim i bërë më 16 shkurt erdhi një ditë pasi presidenti ukrainas, Volodymyr Zelensky, tha se Kievi do të bëjë “gjithçka” për të shpëtuar jetën e njerëzve në këtë qytet simbolik, i cili është i rrethuar në tri anë nga forcat ruse.

“Beteja të ashpra po ndodhin brenda qytetit”, tha Oleksandr Tarnavskiy, gjeneral i ushtrisë ukrainase për zonën në lindje të shtetit.

“Trupat tona po përdorin të gjithë forcat dhe mjetet që kanë për të frenuar armikun”, shtoi ai përmes një postimi në rrjetet sociale.

Gjenerali Tarnavskiy tha se janë përgatitur pozicione të reja “dhe do të vazhdojnë të ndërtohen fortifikime më të fuqishme, duke pasur parasysh të gjitha skenaret”.

Ai tha se Kievi dëshiron të mbrojë trupat e tij.

“Ne çmojmë çdo pëllëmbë të tokës ukrainase, por vlera më e madhe dhe prioriteti ynë kryesor është ruajtja e jetës së ushtarëve ukrainas”, tha gjenerali Tarnavskiy.

Ai e cilësoi situatën në Avdijivka si “të vështirë, por të kontrolluar” dhe tha se komandantëve u është dhënë detyra “që të stabilizojnë situatën”.

Për muaj të tërë, Rusia po tenton që të marrë nën kontroll qytetin e Avdijivkës, që gjendet në rajonin lindor të Donjeckut. Rënia e këtij qyteti mund të jetë një fitore e rëndësishme për Rusinë, e cila ka nisur pushtimin e paprovokuar të Ukrainës në shkurt të vitit 2022.

SHBA ka paralajmëruar se Rusia mund të pushtojë qytetin kyç lindor të Ukrainës, Avdiivka, skena e disa prej luftimeve më të ashpra në muajt e fundit. “Avdiivka rrezikon të bjerë nën kontrollin rus”, tha zëdhënësi i Këshillit të Sigurisë Kombëtare, John Kirby, duke përmendur mungesën e municioneve në Ukrainë.

Presidenti ukrainas Volodymyr Zelensky u zotua të bëjë gjithçka për të “shpëtuar sa më shumë jetë ukrainase”. Trupat ruse kanë arritur përfitime në Avdiivka, duke kërcënuar se do ta rrethojnë atë.

Qyteti, i cili është shkatërruar pothuajse plotësisht, shihet si një portë për në Donetsk aty pranë, kryeqyteti rajonal ukrainas i pushtuar nga luftëtarët rusë në vitin 2014 dhe më vonë i aneksuar në mënyrë të paligjshme nga Moska. Presidenti rus Vladimir Putin filloi një pushtim të plotë të Ukrainës më 24 shkurt 2022.

Në konferencën e së enjtes në Uashington, Kirby tha se Avdiivka mund të bjerë kryesisht sepse forcave ukrainase në terren po i mbarojnë municionet e artilerisë.

“Rusia po dërgon valë pas valë forcash të rekrutuar për të sulmuar pozicionet e Ukrainës”, tha ai. “Dhe për shkak se Kongresi nuk e ka miratuar ende projektligjin shtesë, ne nuk kemi qenë në gjendje t’i ofrojmë Ukrainës predhat e artilerisë që i duhen dëshpërimisht për të ndërprerë këto sulme ruse."

“Forcat ruse po arrijnë tani llogoret ukrainase në Avdiivka dhe po fillojnë të mposhtin mbrojtjen e Ukrainës”.

Në fillim të kësaj jave, Senati i SHBA miratoi një paketë ndihme të huaj prej 95 miliardë dollarësh, duke përfshirë 60 miliardë dollarë për Ukrainën, pas muajsh debatesh politike, por ajo përballet me një betejë të vështirë në Dhomën e Përfaqësuesve.

Ukraina është e varur nga furnizimet me armë nga SHBA-ja dhe aleatët e tjerë perëndimorë për të qenë në gjendje të vazhdojë të luftojë Rusinë, një forcë shumë më e madhe ushtarake me një bollëk municionesh artilerie.

Sekretari i Përgjithshëm i NATO-s, Jen Stoltenberg, paralajmëroi të enjten se dështimi i SHBA-së për të miratuar ndihmën e vazhdueshme ushtarake për Ukrainën kishte tashmë një ndikim në fushën e betejës.