Presidenti i Turqisë, Recep Tayyip Erdoğan , ka zhvilluar një bisedë telefonike me homologun e tij brazilian Luiz Inacio Lula da Silva . Gjatë bisedës u diskutua për marrëdhëniet dypalëshe midis Turqisë dhe Brazilit si dhe për çështje globale dhe rajonale.
Erdogan vlerësoi qëndrimin e lavdërueshëm të Brazilit përballë brutalitetit që Izraeli po imponon në territoret palestineze, duke theksuar nevojën për të shtuar përpjekjet për vendosjen e një armëpushimi të qëndrueshëm dhe dërgimin e ndihmave humanitare në rajon.
Erdoğan vuri në dukje se pavarësisht se Hamasi pranoi armëpushimin , Izraeli vazhdon të përshkallëzojë sulmet dhe mizoritë. Ai theksoi rëndësinë e mbështetjes së iniciativave në lidhje me njohjen e Shtetit të Palestinës në këtë pikë.
Erdogan përmendi se Turqia monitoron nga afër konfliktin e vazhdueshëm midis Ukrainës dhe Rusisë dhe propozoi të punohet drejt negociatave për të vendosur një paqe të drejtë të bazuar në të drejta dhe ligje.
Gjatë bisedës, Erdogan shprehu ngushëllimet e tij për Presidentin Da Silva për humbjen e jetëve nga reshjet e mëdha të shiut, përmbytjet dhe rrëshqitjet e tokës në Brazil, duke konfirmuar solidaritetin e Turqisë me popullin brazilian.
Izraeli ka goditur Gazën në shenjë hakmarrjeje për një sulm të 7 tetorit nga Hamasi, i cili vrau rreth 1,200 njerëz.
Që nga 7 tetori, më shumë se 34.900 palestinezë, duke përfshirë të paktën 15.002 fëmijë dhe 9.893 gra, janë vrarë dhe 78.514 persona janë plagosur në sulmet e Izraelit në Rripin e Gazës, sipas autoriteteve shëndetësore palestineze.
Mbi shtatë muaj pas sulmit izraelit, zona të gjera të Gazës ishin në gërmadha, duke shtyrë 85% të popullsisë së enklavës në zhvendosje të brendshme mes një bllokade gjymtuese të ushqimit, ujit të pastër dhe ilaçeve, sipas OKB-së.
Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar tha se është “e besueshme” që Izraeli po kryen gjenocid në Gaza dhe urdhëroi Tel Avivin të ndalojë akte të tilla dhe të marrë masa për të garantuar ofrimin e ndihmës humanitare për civilët në Gaza.
