Talentet shqiptare vazhdojnë ta pushtojnë Evropën.
Të shumtë janë futbollistët e talentuar shqiptarë që aktivizohen në Zvicër, por kohëve të fundit harta ka nisur të zgjerohet.
Është Italia ajo që po i shikon me një sy tjetër talentet shqiptare e njëri ndër ta është edhe Albian Hajdari.
Mbrojtësi 17-vjeçar i Baselit ka firmosur kontratë 3-vjeçare me klubin e Juventusit.
Lajmi është publikuar nga gazetari italian Nicolo Schira, i cili e bën fakt të kryer transferimin e Hajdarit te bardhezinjtë. Futbollisti është vlerësuar nga drejtuesit si një talent me perspektivë për të ardhmen, teksa fillimisht do të jetë pjesë e të rinjve të Juventusit me shpresën që në të ardhmen të bashkohet me ekipin e parë.
Kujtojmë që Hajdari nuk është shqiptari i vetëm te Juventusi, pasi pjesë e klubit bardhezi është dhe sulmuesi i Kombëtares, Xhakomo Vrioni, i cili aktivizohet me Juventusin U-23.