Trajneri i Uellsit, Robert Page ka folur në një konferencë shtypi para ndeshjes kundër Italisë.
“Skuadra po ndihet shkëlqyeshëm, futbollistët kanë qenë të shkëlqyeshëm deri më tani, gjatë gjithë turneut ne jemi të gjithë së bashku, ndjenja ishte e mrekullueshme pas fitores ndaj Turqisë. Kundër Italisë është një lojë jashtëzakonisht e vështirë “, tha ai.
“Kalimi në raundin tjetër do të thotë gjithçka, për ne, për lojtarët dhe për tifozët në shtëpi. Ne kemi parë çfarë skuadre ka Italia dhe do të duhet të jemi të përgatitur për këtë. Por ne gjithashtu mund të jemi kërcënues”, shtoi ai.
I pyetur për ndryshimet e mundshme në formacion:
“Sigurisht që kjo do të jetë pjesë e procesit të mendimit por, më e rëndësishmja është se ne po luajmë kundër një skuadre shumë të mirë italiane. Duhet ta marrim parasysh këtë. Do të zgjidhet një skuadër që ne besojmë se mund ta fitojë ndeshjen”, përfundoi Robert Page.
